Education department-i Molungyimsen nung temeshi lenmang nung jaja

Molungyimsen, November 13 (TYO): Hokolbarnü School Education & SCERT Minister, Yitachu-i anir school education department-i Molungyimsen Christian Pilgrimage & Naga Educational Heritage village-i temeshi ain atema arua lir.
Parnoki tanü Clark Suspension Bridge, Milak River nungi Molungyimsen tashi kilometer 14 temeshi lenmang nung jaja aser yimertem den ajurutepa sentong ka agia liasü.
Yitachu-i tan agi tasembenbuba Pilgrim Road nung jajar asütsü. Iba lenmang ya Rev. Dr. E W Clark-i Naga hills nung mission mapa inyaktsü atema yangluba lir.
Iba senden nung Yitachu-i o jembidang Christian Pilgrimage village ji tenüng atema dang masü saka chichiba temoatsü angutsü atema südaktsütsüla, ta Molungyimsen yimertem ayongzük.
Alima tesem balala nungi raliwalirtem puatsü atema pilgrimage maparen tajungba inyaktsüla, ta paisa shisem.
“Nagaland Baptist Church Council (NBCC)-ia Naga Christian Heritage Village ta jaloktsüba yimtsüng semdangtsüla, otsüren bushitsüla aser pilgrimage maparen tajungba nung inyaktsüla. Iba onük ya NBCC general secretary-i mungdang nung benoka jembitsü imlar,” ta Yitachu-isa ashi.
Australia nung alir Naga nungertem tenüng nung Apostle Rev L. Yimsong densemba atema Yitachu-isa pelaba metetdaktsü aser alimai metettsü atema World Baptist Alliance nem Christian Pilgrimage village indang osang metetdaktsüla, ta paisa shisem.
Iba sentong nung Industries & Commerce Parliamentary secretary, Amenba Yaden-ia o jembi.
Rev. Dr. E. W. Clark aser Naga nunger asoshi samanir missionary temi October 24, 1976 nung mezüngbuba American Baptist Mission Station Molungyimsen kümtet aser ibaji ajiteta Christian Pilgrimage & Naga Educational Heritage Village ta tenüng jaloktsü, ta tanü NBCC General Secretary Rev. Dr. Zelhou Keyho-i nüngshilung ka meshitetja sarasadema semzüktsü.
Molungyimsen ji “Naga nunger asoshi Jerusalem” ta Rev. Dr. Keyho-i sangoktsü aser paisa Naga nungertem tamang nung takang aser bendanga agütsüba Khristan tem asütsü aser tarutsü putu asoshi tesangwa yapoktsürtem asütsü tayongzükba agütsü.
Sentong nung I. Anungba Sanglir-i Molungyimsen yim indang metetdaktsüdang, Dr. E.W. Clark-i mezüng osangtajungji Molungkimong-i bener aru, ajisüaka Khristan tera ayangdakji Molungyimsen nung liasü aser iba yimtsüng nungi Naga hills ajakleni osangtajung prokshi, ta ashi.
Tanü Commissioner & secretary for school education & SCERT, F.P. Solo-ia temeshi lenmang nung jajaba sentong nung shilem agia liasü.