Education department shiranger

Nagaland nung tebilemtsü tulukaji School Education department shirang maneptetba timtem ya asütsü. Taoba hopta tashika SSA sentong kübok shimba tesayurtem meyirijang ana tashi longkak aita amongba sülen ano tang adhoc nung shimer tesayurtem meyirijang dak tali adenshia parnok mapa nung regularize süjang ta longkak aita amongbaji state government-i tarutsü indang mebilemdangi mashimashi inyakba ajanga adokba tebilemtsü lir. Government-i inyaktsüba mapa tongtibangtem rongnung School Education junga anepalutsüba ya ka lir. Pei lima sensosanger tanurtem school azüng tenzükdang nungi kaketshisatsü shitak agüja yimten aser lokti meimba aser Tsüngrem akümtsübuba senso kaka kümdaktsütsü tangatetba nung government-i sentong yanglutsü aser tesayurtemi junga sayutsü ta süra tanurtem ajak junga adoktsü. Tanü putu nungbo school azüngba maparen nung ‘fail’ asüba indangbo mejembir, kechiyong sayur mangatettsüsaba tanurbo mali, anungji result adokba mapanga ‘na pass ser masü ta masüngdanger, saka toppers rongnung dener maden, distinction subject kwi nung angu aser kechi division aser kechi grade angu ? ta dang asüngdangteper. Iba ama lima ka nung kaketshirten tajungtiba aser tematiba jenjang nung takok angutsü merangteper. Ajisüaka, tejashitsüka, taaktsüka aser tesüngmangtsükaji Nagaland government school nungbo class ter tatidang agütsürtem rongnung kanga agia teimbakati takok mengutetter. Ano, tesüngmangtsü kaji school kar nungibo class ter tatidang nung nisung katia takok menguteter. Takok manguba kuliji aika alitsüa akok saka tamakok anguba kuli masü saka takok angutsüba kuliang bushitep tajungba kümogo. Külen tesayurtem telok telok longkak aiter aser külen goverment school majungba indang jembir ta School Education department shirangba tashidak tuluba tuluba küma odagi. Atangji, government school 294 nung inyaktsü asoshi tesayurtembo agir magima shima lir. Ajisüaka, item tesayurtemji school kar nungbo school tanurtem dang nungi teimba aser ano school kar nungbo tesayur agi meperir ta School Education department ya office ka tenteta maka amai mashimashi inyakba angur. School ajungtsübaji tesayurtem dak keta lir, saka government-i school nung inyaktsü tesayurtem shimba mapa nung ya süoki ia bilema meinyaker. Ibayongji, tesayurtembo tatidanga magi mashimashi dang shimer aser mashimashi transfer yokteper. Tanü tesayurtem longkak ait manentsüsa akümba tia ya government nung yimsüsürtemi school ajungtsü asoshi masü saka ita sen chia alitsü atema pei nisung mashimashi shimokba ajanga adokba tebilemtsütem lir. Item yimsüsürtemji tangbo malitsüa akok saka parnok menen agi kangshir amato tanü lanurtem tawadakdak maka kangshidagi. Akhidangbo, tesayurtem aikati ita sen magia school nung inyak. Item tesayurtem jagi anogo kata leave magi. Parnoki sayutsüba lesson ajak parnok temezüng nung janga liasü. Parnok mapang school-i mao tanga mapa inyaka senzütsübaji kenyongi tim masüba mapa ka liasü. Tanü item jagi anitetba purtem jenjang balala nung tulur aser takar kümer yimten, lokti aser Arogo tenzükdagi. Tanübo kolenang shir marütsü, government-i tesayurtem shimbaji lesson sayudaktsütsü shimer masü ita sen chidaktsütsüba shimer aser tesayurtema aikati lesson sayutsü mejangrar, iba jagi parnoki parnok melen tangar shimer aser ita sen lemsatepa agir. Ano, school ajungtsü atema nübortemi pei alidak lapokba government school-tem peisasa pei meyong kümer anepalutsü asoshi asoshi Village/ Ward Education Board shimer parnok nem khuret nungloktsür. Ajisüaka, item committee-tem jagiang proxy tesayur ayur aser school terenlok mapatem nung temulung magütsür ta angashidang, Naga nungertem yabo temaba jenjang nung alir yimsüsür aser ketdangsertem dang nungi yimtak aser town nung alir tanishirtemang tamajung aser ochimashiba südi ta tezüdanga bilemer. Joko asenok ya khen asentenshitsüla aser pei tetsü tasolima shirangba aneptsü asoshi ochi mulung agi school education inyakyim merükteta metongshitsüla.