Education Ministry-i Aadhaar ajanga ‘Ghost’ tesayur 80,000 putet

New Delhi, Aenjeti (January) 5 (Agencies): Aadhaar tenzükba sülen HRD Ministry-i linük kübok tesem balala nung aliba college aser university tem nung “ghost” tesayur 80,000 shi ka jangjaogo.
Mapai maruba tesayurtemji central university tem nungibo ka dang mali, ta HRD Minister Prakash Javadekar-i metetdaktsü.
“Mapai maruba tesayur kar lir aser parnoki parnok melena tangar mapai yoker aser tanga tesemtem nunga mapa inyaker. Aadhaar tenzükba sülen iba mesükba tesayur 80,000 shi bushitetogo aser parnok ozüng kübok merenshitsü” ta Javadekar-i ashi.
“Mapai maruba tesayurtemji central university nungbo kanga dang maliasü saka parnokji state university aser nijatem nungi liasü” ta paisa shisem.
HRD Ministry-i university ajak dang mapa inyaker aser kaketshir ajak dang nungi Aadhaar number tem meshitsü atema tetuyuba agütsüogo.
“Aadhaar number agütsübaji nü indang mobile number mesüra email id agütsüba den kasa lir. Nü indang mobile number agütsüba ajanga tangar kati nü indang text message tem azüngtsü makok. Iba kasaji Aadhaar ya-a lir” ta HRD Minister-isa metetdaktsü.