Education Policy tasenba ajanga India oshitem ajungkettsü: Javadekar

New Delhi, August 17 (Agencies): Sorkari tang teinyakdak aliba New Education Policy (NEP) ajanga Sanskrit oshi densema India nunger oshi ajak ajungkettsütsü, ta tanü HRD Minister, Prakash Javadekar-i metetdaktsü.
“India sorkar tangatetbaji- India nunger oshi ajak terenlok alitsüla. Khenkhenbo ni yamai bilemer- British nunger oshi dang nungi tali asenoki tesüiba küm 50-60 nung oshi ajungkettsür ama bilemer. Ajisüaka English oshi ya kanga tajung,” ta ashi.
Sanskrit oshi ajungkettsüba sentong ka nung jembidang Javadekar-i iba o jembia liasü.
New Education Policy (NEP) dak sentakba nung pai, tamalen Commission temia Sanskrit oshi atema nendaka inyakogo, ta ashi.
“Onokia NEP atema inyakdar aser Parliament nunga o lemtep liasü. India nunger oshitem terenlok atema shingaia mashishi, kechiyong ibaji ajanga asen sobaliba ajungkettsütsü. India nunger oshi ajakji pei sasep nung tongtibang,” ta Union Minister-i ashi.
Pai ashiba agi, alima ajaklen University tem nung Sanskrit lir aser iba oshi indang oshioben tajung lir.
Minister-isa, school kaketshir aikati Sanskrit shimmer, kechiyong iba subject ya mark aika ngutetba subject lir, ta ashi.