Efrata Nungi Yimsusur Ka

~  Rev I. Lanu Jamir, Missionary

Bethlehem ya yim tenüng tasenba aser Efrata ya yim tenüng tejenba  (Lipok 35:19 ). Bethlehem tetezü amtsük ki (house of bread). Yisuji asenok asoshi taküm chiyongtsü (Jesus is the bread of life ).Efrata tetezü tejang atangba ( fruitful ). Angatetsü asoshi asenoki Kolosi 1:10 züngdangra yamai zülua lir – Tsüngrem metetba nung rena, mapa tajung ajak nung tejang tanga (being fruitful in every good work.)
Yisu Khrista masodang küm 730 tejakdang Iasiah ainkari , Yisu Khrista iba alimai arutsu shin. Ano Mika ainkarribo  Efrata nungi yimsüsür ka ( Mika 5:2 ) adoktsü indang shinba atalok. Aser iba yimsüsüba indangji Isaiah ainkari tongtipang telemsa pezüsü nung jembia lir (Isaiah 9:6-7 ). Mezüngbuba – Pa tenüng tesüngmangtsü, teshisadanger (wonderful counselor). Tetezü : Pa dakji yimsü asütsü tashi balaka alitsü. Ano Paji yimsü asütsü asoshi shisatsü (wisdom) alitsü (Isaiah 11: 2-3). Tanabuba – Tsüngrem tashi tulusang (mighty God ). Tetezu: Pa dakji  tsükchir aser temenen mapa ajak kokteta yimsü sütetsü tashi balaka alitsü ( Isaiah 11:4 ).Tasembuba – Tatem maka tebu ( everlasting father ). Tetezü: Pai Pa dak amangba purtem ajak madak mapang ajak nung anepalutsü (Isaiah 9:7).Pezübuba – Yimjung chuba chir ( prince of peace ). Tetezü: Meimchir taküm, libaliruba koba jenjang nung lidir liaka ajak madak aser ajak taküm litetsü, Pai yimjung nung yimsü asütsü (Isaiah 11: 6-9 ). Aser iba yimsüsübaji Dawid chuba kin kidong nungi alitsü.
Yisu Bethlehem nung sor, sür shia arur kotaki aoba  ajakji tongtipang saka Pa tanaben meyipa arua yimsü asütsübaji  tongtipangtiba. Luke 1: 31-33 zülua aliba shinba aika atalokogo saka ano Pa nem Dawid chuba yimli nung yimsü asütsübaji magütsü – aser ibaji Yakob kidong madak Pai teti chubatsü aser Pa yimsüsüba  tatem maka , item ya ano matalok aser ataloktsü ta asenoki amanger. Khrista tasodang nungi chuba aser yimsüsür ta neburtemi metet. Kechiaser tashi temetetertemi Pa nem sempet bener arutsü, sannükertemi Pa külem. Ano  tenyartemi Pa chuba ta meteta , Pa arutsü osang sangoktsü.
Temeim adianutem, Kibuba Yisu shiba Bethlehem (Efrata ) nung tsük mejakdak ki ka nung aso, aser kalvari kangki nung asüba ajanga Pai asenok temenen nungi alangzük, kobi melii  tanaben iba limai yimsü asütsü asoshi arutsü. Tsüngrem Otem jagi jangjatsür – Yisui iba lima nungi Pa yimli yangertsü. Aser iba yimli aser yimsüsübaji shirnoki Pa dak amanger item mulungjang nung Pai yimsü asütsü. Naia iba yimsüsürji meteta lir na ? Pai ne taküm, kibong aser lokti nung yimsü süner. AMEN.