EGH nungi ali kiburtemi parnok ali melena sen meshir

Tura, December 13 (Agencies): East Garo Hills nung 2 lane National Highway – 44 yanglutsüba atema ali agütsüba ali kiburtemi parnok li atema state sorkari alimelen sen magütsüba atema ashishiogo. Iba Highway ya December 16 nü Ato Kilonser Narendra Modi-i lapoktsütsüba lir.
NH 44 yagi West Garo Hills nung Tura jila state yimtiba Shillong den WKH nung Nongstoin tesem ajanga sendaktepdaktsür, aser iba ya Northeast tesem nung lenmangtem rongnung tajungtiba ka lir.
Iba tashishiba ya Ato Kilonseri state semdangtsüba aliba mapang ka nung agütsüogo, ajisüaka East Garo Hills administration ajanga yakta dang iba lenmang ajanga kongshia aliba yimdakleirtem dang parnok tangutsü tim tekaratiba nung agütsütsü ta nangzükogo, aser paper work tatembangbuba temelaba agitsüba atema dang anunga lir, ta metetdaktsü.
“Iba ken o ya state Deputy Chief Minister-i agizükadokogo anungji joko anogo ka ana dang agitsü akok. Onok paper work tatembangbuba atema dang atadar aser iba sülenbo iba lenmang yanglu dang takoksa ajuruba purtem nem sen teyari agütsütsü,” ta deputy commissioner, Ram Kumar-i ashi.
Nengminza Adok, Rongapgre, Mangsang Adok, Dilmagre, Ampanggre, Samanda aser Rongalgre nungi Ang parnok 6-i item nüburtem nem ali melen sen magütsüba atema ashishia liasü.
“Onok nem sen tagütsütsü tim magütsüi lenmang lapoktsüba ya kechi tetezü? Iba ken o ya aitsütsü asoshi kanga dang temsüa lir, kechiyong onok li agir joko küm pongububa lir. Onoki onok tangutsü tim aginer,” ta Ang rongnungi kati ashi.
Temalen shisema aliba yimtsüngtem nungi ali kibur parnok 32 nem tang tashi lenmang yangluba mapang nung nung parnok ali aser dokan nunger dak kongshiba melena sen magütsüi lir.