Egypt: 2013 Rabaa longkak aitba ken o nung obendang agütsü

Cairo, Rongjui/September 8 (Agencies): 2013 küm mener longkak aitba sentong ka nung shilem agiba atema Egypt nung okadak ka ajanga Muslim Brotherhood nung lenirtem densema nisung 75 tasüba agi merenshi asoshi obendang agütsüogo.
Tasüba agi merenshitsü asoshi obendanger agütsürtem rongnung Brotherhood lenir Essam al-Erian aser Mohamed Beltagi na den nüngtugu Islam yimsü sayutsüngir Safwat Higazi nunger densema lir.
Nisung tepsetba nungi tenzüker oset tsür raksatsüba dak sendakba aija alir nisung 739 rongnungi Muslim Brotherhood tekolakba Mohammed Badie densema parnok 46 tashi taküm tepeyong tepuokdak ayutsü asoshi okadak ka ajanga obendang agütsüogo.
Photojournalist Mahmoud Abu Zaid shiba dang “Shawkan,” ta ajar pa küm pongu tepuokdak ayutsü asoshi obendang agütsüogo aser iba tetezü pa küm pongubo tepuokdak yuadoker asünung nüjiso nguogo.
Longkak aitba sentong ya Mohammed Morsi pusemertemi ayongsüka aka. Pa ya Brotherhood lenir ka liasü aser 2012 küm Egypt nung tazüokba kecha makai shimba mezüngbuba Tir liasü, saka küm ka sülen pa tang aliba tir Abdel-Fattah el-Sissi lenisüba kübok military-i atsüngtok.
2013 küm iba longkak aitba sentong akaba mapang nisung 600 shi süogo.