Egypt-i activist-tem rishikangshibaren anentsü ajungshir: UN

Egypt yimtiba, Cairo kübok Italian embassy kimalen agiba asür Giulio Regeni bilemtetba sentong nung “Giulio, onok rong nung ka aser onok ama tepset” ozülu abener nübur temeten asoshi nokdakertemi Egypt sorkar anema longkak aitdang agiba noksa angur. Oxford kaketshir, Italy nunger Giulio Cairo yimti tezülen taoba February ita tepseta liasü. (Cairo, March 24)

 United Nations, March 24 (Agencies): Egypt-i nübur temeten asoshi nokdakba nisungtem arishia parnok rishikangshiba maparen anentsü tajungshiba olen ka United Nations (UN)-i tanü, Brehostibar nü metetdaktsüogo.

UN den Human Rights Watch (HRW) aser Amnesty International (AI) na densema, alima jenjang nung tentetba tentet 14 tashi Egypt-i nübur temeten asoshi nokdakbapur aibelena inyakba kuli mongui apuba, parnok senzüsenpongtsüren nokdangba aser par senotsü mamshidaktsüi nokdanga ayuba maparen anentsü asoshi Egypt sorkar ajungshiogo.

Egypt sorkari tamendakdak maliba ken o nung ajemdaker apuba nübur temeten asoshi nokdakbapur tepuodak merenshia rishikangshiba osang bushiteta lir ta UN-isa metetdaktsüogo.

“Egypt sorkari amokmerenba maparen den tesashiba inyaka, sorkari aibelenba anema nokdakertem nem ola madokdaktsüi parnok ajemrepa ayutsü tenzükogo,” ta HRW kübok Middle East nung deputy director, Nadim Houry-ia Egypt aija ashi.

“Egypt sorkari par linük nung tentetba lokti tentettem sorkar arrür ama züngshitsü tenzükogo,” ta AI kübok Middle East & North Africa Program nung deputy director, Said Boumedouha-ia metetdaktsüogo.