Egypt-i Al Jazeera osangbener 3 nem temerenshi agütsür

Al Jazeera television osangbener, Mohamed Fahmy (Tiyongtsü) aser Baher Mohamed (Abelen, tesülen) na den külemi, okatsür Amal Clooney (Achijilen, tanabuba) nungeri o tanü bendang agütsüba jakdang osangbener den Cairo nung tentetba okadak ajurutepba noksa nung angur. (Cairo, August 29)

Cairo, August 29 (Agencies): Egypt nung tentetba okadak kati Al Jazeera osangbener 3 nem tepuokdak küm 3 tashi puoka ayutsü o bendang tanü Honibar nü agütsüogo.
Egypt sorkari kiralongrar telok ta züngshiba Muslim Brotherhood yimtenren telok pusemba ken o nung aitsüba sülen okadaki oangbener 3 nemji iba temerenshi agütsüba osang jangjaogo.
“Tanü agütsüba o bendangji tamendakdak maliba o bendang lir. Ozü osangbener nem temerenshi agütsüba ajanga Egypt nung tetsükdakba kecha majurui pei tebilemba lemsateptsü temeten ajemrepa ayuba kuli angur,” ta Al Jazeera nung acting diretor, Mostefa Souag-i tanü obendang agütsüba sülen kanga jashia ashi.
“Alima ajungai chiokadoktsü ajungshiba yong Egypt-i tanü merenshiba osangbenertemji shitakbasa chioktsü imala liasü saka Egypt-i oda osangbener 3-ji merenshiogo,” ta nübur temeten asoshi nokdakba telok tetsüti, Amnesty International ketdangser, Nicholas Piachaud-ia kanga mepelai ashi.
“Egypt sorkar nungi temelaba magi osettsüset abenba aser sorkar anema olulu prokshiba kuli bushitetba sülen tanü osangbenertemji merenshiogo,” ta tanü o bendang agütsüba o bendanger Hassan Farid-i tesülen metetdaktsü.
Yaküm 2014 küm December ita pua ayuba Canada nunger Mohamed Fahmy, Egypt nunger Baher Mohamed aser Australia nunger Peter Greste nunger nem tan August ita tetenzüklen o bendang agütsütsü imla liasü saka okadaki parnok anema benokba ken o angadangba sentong thinena arur külen tanü ang o bendangji agütsür lir.
“Tanü temerenshi agütsüba ajanga osangbenertemi parnok nem nungloktsüba mapa inyaka ochi osang benaka, parnok oda merenshitettsü ta Egypt-i alima dang metetdaktsür lir. Ano, Egypt nung o bendangertem ajunga yimsüsürtemi amokbanger aliba kulia angur,” ta Fahmy’er okatsür, Amal Clooney-ia metetdaktsü.
Egypt-i taoba Tir aser Muslim Brotherhood lenisang, Mohamed Morsi tashiyim agi yimsüsütsü menden nungi 2013 küm July ita atsüngdokba sülen Tir tasenba, Abdel Fattah el-Sissi-i aniba Egypt sorkari Brotherhood telok samatsütsü merangba kuli jenti bushiteta lir.