Egypt-i MB telok pusemer 2 merenshir

Cairo, October 29 (Agencies): Egypt nung tentetba okadak kati Muslim Brotherhood telok pusemer nisung 2 aitsüba sülen tena taküm tepiyong tepuokdak puoka ayutsü temerenshi tanü, Honibar nü agütsüogo.
Egypt-i democracy yimsüsütsü yimya benshia shimba mezüngbuba Tir, Mohamed Mursi yimsüsütsü menden nungi tashiyim agi 2013 küm anentsüba sülen Cairo yimti nung adokba raratep lendong nung Muslim Brotherhood telok pusema yariba ken o nung aitsüba sülen okadaki tan nisung 2-ji merenshi.
Ano, kasa ken o nung aitsüba sülen Muslim Brotherhood telok pusemer nisung 16 tashi nem tepuokdak küm 15 tashi puoka ayutsü temerenshi agütsüba osanga jangjaogo.
Nüburtemi kanga sashia Mursi anema longkak aittsü tenzükba sülen Egypt mitkartemi Muslim Brotherhood telok lenisang, Mursi 2013 küm July ita tashiyim agi Tir menden nungi anentsü aser iba ajanga adokba raratep lendong nung nisung 7 tashi tepseta liasü.