Egypt-i Saudi Arabia nem Red Sea asetkong 2 memeyiptsütsü lemteter

Egypt-i Saudi Arabia nem Red Sea asetkong 2 memeyiptsütsü lemteter

Egypt Tir, Abdel-Fattah el-Sissi (Abelen)-i Saudi Arabia chuba, King Salman den Cario yimtiba nung  taküm April ita ajurutepdang agiba noksa ka yangi angur. Tenati April ita ajurutepdang  Tiran aser Sanfir asetkong Saudi Arabia nem tanaben meyiptsütsü tezüngzütkep agia liasü. (Cairo, June 21)

Cairo, June 21 (Agencies): Red Sea nung tentetba asetkong ana Saudi Arabia linük nem memeyiptsütsü lemtetba osang ka Egypt nung tentetba okadak kati tanü, Mongolbar nü metetdaktsüogo.
“Saudi linük nem asetkong ana meyiptsütsüji ozüng alema inyaker asütsü,” ta shia, okadaki sorkari benokba onük magizüki asetkong anaji Saudi sorkar nem memeyiptsütsü lemtetba osang jangjaogo.
Saudi sorkar den taküm April ita agiba tzüyim arrtsü den sentakba tezüngzüktep ka kübok Tiran aser Sanfir asetkong na Saudi sorkar nem meyipa agütsütsü asoshi Egypt sorkari agia liasü.
Tiran aser Sanfir asetkong naji akidang nungi Saudi Arabia yimli kübok ait aser asetkong anaji Saudi meyong asüba yong kasaji Saudi sorkar nem tanaben meyiptsütsü asoshi Eygpt sorkari lemteta liasü.
Ajisüaka, okadaki sorkari agiba telemtetba magizüki asetkong anaji Saudi sorkar nem tanaben memeyiptsütsü obendang agütsü.
Ano külen, tan okadaki Tiran aser Sanfir asetkong Saudi sorkar nem memeyiptsütsü lemtetba ajanga par Egypt aser Saudi linük na tsüngda tesendaktep mejungi kümdaktsütsü akok ta sorkar ketdangsertemi metetdaktsüogo.
Tiran asektong reprangtsü tashi Egypt mitkar ket nung lir ta shia, Saudi sorkari Tiran aser Sanfir asektong na ketdang asütsü temelaba Egypt nem 1950 küm agütsü.
Ajisüaka, 1967 tongpang nung Egypt-i Israel’er rongtem asetkong anaji ajangdanga mesenzüdaktsütsü lemtetba sülen Israel-i asetkong anaji tashiyim agi agiadok.
Tesülen, 1979 küm Egypt aser Israel na tsüngda yimjung tezüngzüktep agiba sülen Israel-i asetkong anaji Egypt nem tanaben  meyiptsü.

You must be logged in to post a comment Login