Egypt nightclub nung bomb lendong atalok; 16 pokset, 3 yiru

Cairo, December 04 (Agencies): Egypt yimtiba, Cairo nung tentetba nightclub-cum-restaurant ka nung mejangjatetba nisung 3-i pokshiba lendong ka tanü Hokolbar nü atalokdaktsü ta Egypt Interior Ministry-i metetdaktsüogo.

Sü agi tejak meyibangba nisung 3-i motorcyle ka nung mener arua Tahrir Square nungi kilometer 5 shi pilar tentetba nightclub nung pokshitsü lendongji atalokdaktsüba ajanga tetsür 3 aser tebur 11 densema ajak agi nisung 15 pokdaktsü ta ministry-i ashi.

“Tan lendong ajurushiba nightclub nung mapa inyaker aser lanur telok ka tsüngda mangatettep adoka asatepba sülen tanü amaker 3 jagi El Sayad nightclub nung pokshitsü lendongji atalokdaktsüba osang tang tashi nung bushitetogo,” ta ministry-i osang jangjashitsü.

“Molotov pokshitsü oset 15 shi onlokja atalokdaktsüba lendong nung nisung 3 yiruba osanga jangjaogo. Ajisüaka, tan lendong ya kiralongrartemi atalokdaktsüba lendong ka masü,” ta ministry-isa shisem.

Agouza district nung tentetba nightclub telungi meidaktsüba yong jashia lendong atalokdaktsür 3-ji aputsü asoshi police-i bushisüngdang tenzüka lir ta sorkari ketdang asüba MENA osangia metetdaktsüogo.