Egypt nung Islamic kiralongrartemi Coptic Khristan 26 tepset

Cairo, May 26 (Agencies): Egypt nung Islamic kiralongrartem ta temulung melemi bilemertemi Coptic Christian telok ka amakdang, nisung 26 tepset aser 26 yirutsü.
ISIS-0i Egypt nung aliba Coptic Khristantem amaktsü ta tenangzükba agia metetdaktsüogo. Egypt linük nütsüng yongsük noklang nung Coptic Khristantem ya shilem 10 shi lir aser parnok ya Egypt nung lisopurtem lir.
Cairo anüdoklentip tsütsü aliba Minya Province nung Khristan ketdangser kati ashiba agi, kiralongrartemi jagi Monastery of St. Samuel-i aoer truck aser bus gari amak.
Khristan tamanger telok nungjagi tanur asem dang yiruyibong kecha mesüi kümzük, ta paisa ashi.
Nisung 26 asüba osang jangjaogo saka ano teimba asütsü akok, ta Egpyt Health Ministry otongdar Khaled Mogahed-i ashi.
“Onok monastery tong aotsü atema tetsüdaktsü aika ajurur kechiyong monastery ji lisem lima tiyongtsü nung lir. Iba osang angashia, onok kanga süngmanger. Kiralongrartem jagi tanurtem dena tepsetogo” ta Minya province nung Khristan ketdangser Ibram Samir-i metetdaktsü.
Kiralongrartemji parnok nisung 8 nungi 10 shi liasü aser parnok military uniform sübor liasü ta tenük agi angurtemi kuli agütsü.
Iba tatalokba atema telok shingaia tenüng agiba osang memetetdaktsü saka tesüiba mapang aser ita ishika tsüngda Islamic State (IS) kiralongrartemi Coptic pur makyonga aruogo.
Yaküm December ita tenlaki ka amakba atema ISIS-i tenüng agiogo. Ani taküm April ita Palm Sunday nung tenlaki ana amakba atema-a parnokisa tenüng agia sangdongogo. Iba lendong nung nisung 49 taküm sama.
Tan ita tetenzüklen tu ISIS-isa Egpyt nung Khristantem amaktsü ta nangzükba osang metetdaktsüogo.
“Onoki nenok dang Khristantem aser army o police adenshiba tesemtem nungi pila alitsü metetdaktsür” ISIS-i hopta shia adokba Al Naba nung metetdaktsü.
Nübo agi tangar memenepertem kanga bulua amakba ajanga Egypt Tir, Abdel Fattah al-Sisi-i emergency sangdongogo aser talila bilemloka oa amangertem nungi nübortem kümzüka ayutsü ta metetdaktsüogo.