Egypt nung Khristantem ISIS nungi ajener

February 28, 2017 (Agencies) : Egypt kübok Northern Sinai nung aliba Arish tesem nung Islamic State-i azütokshi mapa inyakba nung Khristantem aika jena aogo aser parnok tang Ismailia nung jenoka lir.
January 30, 2017 nungi taoba Brihostibar tashi nung Arish nung Khristan tamanger 7 tashi tepsetogo aser iba ajanga Khristan kobong noklang aika tetsübu nung jena ao.
“Iba tensa ya kodang süngjema akümtsü?” ta Arish nung jena arur Qirollos Shawki-i osangbener dang ashi.
Arish nungi jena arurtemi ashiba agi, kiralongrartemi online nung tasütsüpurtem ta ser tenüngtem metetdaktsü aser ano parnoki yimdong nunga Khristantem oadokang mesüra tepsettsü ta tezülubatem yutsü.
“Syria mesüra Iraq nunga majurudangba kiralongra mapa onoki ajuruogo. Onok ki telung nung kanga tsübuseta liasü aser koba mapang nisung kar arua kishi nung akoshitsü aser onok tepsettsü ta tetsübu nung liasü” ta nisung kati osangbener dang ashi.
Northern Sinai nung Islamic State-i kanga bulua mapa inyaker aser parnoki Khristantem tepsetba atema tenüng agiogo. Tasürtem rongnung pungu kahset, ka tekolak atang aser ka mi agi rongset.
Egypt President, Abdel Fattah el-Sisi-i sorkar dang Arish toktsür jena aoertem tanaben meyipa arua alitsü atema mapa inyakang ta tetuyuba agütsüogo.
Khristan kibong aika Arish nung dang lir, kechiyong parnok jena aotsü atema gari mangur.
“Kiralongrartemi driver tem dang parnoki Khristan kar danga Arishi nungi tangaleni anir ora tepsettsü ta amokmerena lir. Parnoki gariji amaktsü ta amokmeren” ta Priest Abraham Fahmi-i osangbener dang ashi.
“Nisungtem tekolok nung kanga anibelemogo. Parnoki chiyungtsü, tzü mesüra mejangtsü mejangrar. Parnok indang khuret koktettsü atema dang parnoki telangzzübatem aginür” ta aid worker aser Ismailia nung alir, Iman Saad-isa ashi.
Taoba hopta Islamic State-i video ka sayaba nung Egypt Christians amokmerena lir. Parnoki yaküm December ita Cairo yimti nung aliba St Mark’s Cathedral amakdang nisung 28 poksetba den tuluba inyaktsü ta IS-i amokmerenogo.
Egypt linük nütsüng yongsükji million 90 shi aliba nungi Orthodox Copts shilem 10 shi lir aser parnok ya Middle East nung Khristan tamanger telok tuluba ta züngshir. Parnoka mapang talangka reshikangshir ta metetdaktsüogo.