Egypt nung Khristmas mapang mitkar 230,000-i anüktsü

Cairo (Egypt), December 21 (Agencies): Egypt linük nung Khristanpur tekülem ki aser Muslim nunger tekülem ki amakba lendong kanga bula ataloka aruba ajanga taruba hopta Egypt nung Khristmas amongba mapang mitkar 230,000-i anüktsü lemtetogo.
“Linük tesem ajunga nung mitkartem aser mitkar ketdangser ajunga nem sodi magütsü,” ta mitkar osang ka ajanga ashi.
“Kiralongrar telok balalai amakba nungi nokdangtsü aser North Sinai arrtsü aser sorkar indang office balala nung mitkartem yakyakshitsü asoshi tetuyuba agütsüogo,” ta kasa osang ajanga ashi.
Mitkartem ya Egypt nung aliba Tenlaki 2,626 nung alitsü aser ketdangsertemi nüburtem kazüba moapu aser raliwalirtemi semdangba tongtibang tesemtem nunga tenük yoka nükdagi.
Egypt nung tekülem kitem amakba ajanga tekülem ki nung CCTV aser metal detector system inokogo.
Taoba küm December ita Egypt yimtiba, Cairo nung aliba St. Peter aser St. Paul tekülem ki nung suicide bomb pokloktsüba mapang nisung 29 asü; Taküm April ita Palm Sunday amongba mapang Tanta nung aliba St. George Cathedral aser Alexandria nung aliba St. Mark’s Cathedral nung bomb pokloktsüba lendong nung nisung 47 asü.
November ita nunga Bir Al-Abed nung aliba Muslim nunger tekülem ki ka amakba nung Muslim nunger nisung 300 dak tali asü. Iba lendong ya Islamic State kiralongrartemi agütsü, ta parnok sasa tenüng agi.
2013 küm Islamist Tir Mohamed Morsi ya menden nungi Egypt mitkartemi atsüngdokba sülen kiralongrar telok balalai Egypt nung lendong agütsü tenzük.