Egypt nung police 8 kahset

May 8, 2016 nü Egypt yimtiba Cairo anüolentip tsütsü Helwan district nung nüburtem police indang minivan ka longbanga nokdaker aliba noksa nung angur. Iba gari nung memetetba nisung pezüi injang kahlokja police 8 kahset, ta Interior Ministry sangdong ka ajanga metetdaktsü.

Cairo, May 08 (Agencies) : Prangpong amer memetetba nisung kari Deobar anepdang yakta Egypt yimtiba Cairo anüolentip tsütsü Helwan district nung police ti (8) kahset, ta Deobarnü interior ministry sangdong ka ajanga metetdaktsü.
Item police tem ya mini van  ka nung mener oya-a lia pickup truck gari ka nung prangpong bener nisung pezüi parnok nokdanger injang kahloktsü, ta sangdong ajangasa ashi.
Police tasür rongnungji lieutenant ka dena liasü aser tanüngba tenetji kecha rank mali asü. Parnok ya linük yimtiba Cairo anüolentip tsütsü mita aoba mapang iba injang lendong ajurua asü, ta ministry-i ashi.
Linük nung ozüng alema kanga lungkak aitepba ajanga tesüiba mapang linük Tir, Islam amanger Mohamed Morsi mapa nungi anendaktsüba sülen iba ama azütokshiba kanga bulur.
Jihad atema raratemi tensa mejungi aliba Sinai Peninsula nungi tenzüka iba ama azü tokshi mapa inyaker aser linük yimtiba nung dena amshia aoer.
Iba ama amakba mapang police aser army noklang aika kahsetogo.
Morsi pusemertem aputsü atema police temi kanga sashia mitba ajanga parnoki iba ama mapa inyaker ta item telungpuri lendong agütsüba shia ashir.
Police-i tang tashi nung anema nokdakertem nisung noklang aika kahsetogo aser meyirjang aika pua lir.
Iba ama nisung tepsetba ya Sinai nung aliba Islamic State (IS) lenisüba kübok aliba telok, Ansar Beit Al-Maqdes-i timba nangzüka lir.