Egypt Tir, Sisi-i par Oil Minister dang cabinet tasenba tentettsü tuyur

Egypt Tir, Abdel Fattach al-Sisi (Tiyongtsü)-i Cairo yimti nung par yimsüsürtem den senden ka tanü Honibar nü amenba noksa nung angur. Sisi-i par Oil Minister, Sherif Ismail dang hopta ka tsüngda nung cabinet tasenba tentettsü tuyuba osang jangjaogo. (Cairo, September 12)

Cairo, September 12 (Agencies): Egypt Tir, Abdel Fattach al-Sisi-i par Oil Minister, Sherif Ismail nem hopta ka tsüngda nung cabinet tasenba tentettsü tetuyuba ka tanü Honibar nü agütsüogo.
Egypt yimsüsürtemi par sorkar loksatsü lemtetba osang benokba sülen Sisis-i iba tetuyuba ya agütsü ta Tir office-i metetdaktsü.
Kechi timtem ajanga Egypt sorkarji loksatsüsa aküm iba osangji tang tashi mejangjateti lir saka Tir Sisi-i par minister ishika dak temulung melemi aruba sülen tan sorkarji loksaba osang jangjaogo.
Ochimashiba ken o nung ajemdaker Egypt police-i par agriculture minister pua tepuokdak yur hopta ka shi süir külen tang Egypt sorkarji loksar lir.
Egypt nüburtemi longkak kanga sashia aita par linük madak tashiyim agi yimsü asüsang, Hosni Mubarak yimsüsütsü menden nungi 2011 küm atsüngdokba sülen Egypt linük indang rongsenren jenjang mejungi akümba den külemi, par linüki Islamic State kiralongrar telok den sentaktepba kiralongrar telok balala den sentakba khuret tulu tang benoka lir.
Aji oda, Ismail-i taoba Ato Kilonser, Ibrahim Mehleb melenzüka Ato Kilonser tasenba akümtsü akok.
Taoba mapang nung tongti sorkar menden balala abensang, Ismail ya Egypt’er minister-tem rong nung mapa akokba minister ka aliba osanga jangjaogo.
Ismail-i Egypt Oil Minister menden abendang par linük nung yimtenren den sentakba temelenshi tajung aika bener arutsüba, energy den sentakba subsidy agütüsüba maparen ajema kümdaktsüba aser par Egypt’er rongsenren jenjang tajungba kümdakja bendanglen tentetba energy company aika nem sentsü sen meyiptsüba osang bushiteta lir.
Ano külen, sorkar tasenba metentet tashi par linük indang yimsüsütsüren maneni abentsü asoshi Sisi-i taoba cabinet züngsemtem dang metetdakja lir.
Arab lima ajunga nung nütsüng yongsük timba aliba Egypt linüki taruba October ita parliamentary election agitsü renema lir.
Egypt nüburtemi democracy yimsüsütsü yimya benshia shimtetba mezüngbuba Tir, Mohamed Mursi anema longkak kanga sashi aitba sülen idangji mitkar lenisang menden bena alisang, Sisi-i Mursi Tir menden nungi tashiyim agi 2013 küm anendaktsü.
Egypt nung yimtenren aser rongsenren tia tajungba kümdaktsütsü nangzüksang, Sisi-i tesangküm, 2014 küm Tir election nung takok ngua ozüngi melaba ama Egypt Tir menden benok.