Egypt:Tzümetsüng agi nisung 22 dak tema asü, 72 yiru

Cairo, October 30 (Agencies) : Egypt tesem kar nung tzünglu tesashi alua tzü metsüngba ajanga nisung 22 dak tema asü aser 72 yirur lir, ta ketdangsertemi ashi.
Health ministry atema otongdar Khaled Megahed-i, kibong kari osang magütsüba agi tang ashi tasübaji tang metetdaktsüba dang nungi timba asütsü. Brihostibarnü nungi tzümetsüng dang asür karbo kinungertemi rematokogo aser item osang ajakbo onok dangi maru, ta ashi.
Tzü metsüng agi kongshir aliba tesemtem nem sorkari sen million pounds 50 (USD 5.6 million/five million euros) teyari agütsü ta yashi Honibarnü metetdaktsüogo. Tan tzü metsüng agi kongshiba tesemtemji Sohag, South Sinai aser temerem tzüyim nung tzükümtem lir.
Al-Masry Al-Youm aser Al-Watan osangkaket ajanga ashiba agi, sorkari iba lendong atema temulung süa meinyakba agi Ras Gharib nung aliba nüburtemi parnok dang mepelaba sayua Ato Kilonser Sharif Ismail anir oyaa aliba convoy ka nokdang.
Ras Gharib ya Suez Gulf tebanglen lir aser tan tzü metsüng agi iba tesem nung tamajungba kongshia nisung 9 asü.
Sohag province nunga tzü metsünga aliba tesem ka nung bus ka meküpokdang samaba nisung trok tang tashi mangu bushidar.
Egypt nung infrastructure kanga tashi maitba tesem kar nung tsüngküm mapang tzünglu aludang iba ama tzü metsüng ya küm shia amai ataloker.