Eid benjungnü Kashmir tesem aika nung rara adok

Srinagar, June 26, 2017: Hombarnü ‘Eid’ sarasadem tembangba sülen Srinagar nung longkak aitertem aser sepaitem tsüngda rara adokba noksa nung angur. 

Srinagar, June 26 (Agencies): Tanü Eid-ul-Fitr benjungti anogo nung Kashmir tesem ajaklen Muslim nunger tamangertem mosques, shrines aser Eidgahs nung sarasadema liasü, ajisüaka sarasadem tembangba sülen Kashmir tesem aika nung longkak aitertem aser security sepaitem tsüngda raratepa liasü.
Ita piyong Ramazan lumia amungba sülen tanü Muslim nunger Eidgahs (sarasademba moapu) aser mosques nung tenüngsang agüja sarasadema liasü.
Kashmir nung nisung timtiba adenshibaji Hazratbal shrine nung liasü, kong tamanger 50,000 dak tema adenshia sarasadem, ta ketdangsertemi ashi.
Ano Eidgah nunga nisung 40,000 dak tema adenshia sarasadema liasü.
Ajisüaka sarasadem sentong tembangba sülen Sopore, Anantnag, Rajpora, Shopian jilatem aser Srinagar, Safakadal tesem nungbo longkak aitertemi security sepaitem dak long agi ona rara adoka liasü. Kashmir tesem balala nung item rara ajanga nisung 20 dak tema yiruogo.
South Kashmir town, Anantnag nunga ketdangser ka densema police pongu yiru.
Srinagar yimti tejenba nunga Central Reserve Police Force (CRPF) sepai ana yiru.
Yashi Jammu & Kashmir Inspector General of Police-i kanga tongtibang nisungtem dang security junga aliba tesemtem nung ang Eid sarasademtsü asüngdanga liasü.
Eid benjung anogo nung lokti tulu adenshidak Separatist lenirtem aden nungbo lendong tulu adoktsü südi, ta bilema ketdangsertemi Syed Ali Geelani aser Mirwaiz Umar Farooq na densema separatist lenirtem ‘house arrest’ süa liasü, ta ketdangsertemi ashi.
Ano JKLF Mendenbuba, Mohammad Yasin Malik bo Central Jail, Srinagar nung puoka lir.