Election agiba state tem nung ozüng alema amshiba sen crore 62 apu

New Delhi, April 18 (Agencies): Tang state pongu nung assembly election tagitak mapang ka nung Election Commission (EC)-i shima aliba surveillance team temi election agiba state tem nung ozüng alema amshiba sen crore 62 puogo aser item rongnung Tamil Nadu nung sen timba, crore 24.90 apu.

Assam nung assembly election tembangogo aser West Bengal nung election telemsa ana agir ano telemsa pezü agitsü anünga lir.

Tang tesüsabuba apuba senji West Bengal nung crore 12.84 aser Assam nung crore 12.33 pua lir. Kerala nunga sen crore 11.73 shi puogo aser Puducherry nung lakh 60.88 shi puogo, ta EC-i metetdaktsü.

“Tang tashi nung sen ajak agi crore 62.41 shi puogo. West Bengal nungbo sen kar apuba sülen meyipa agütsüogo, aser iba senjibo züngdangba nungji maden,” ta parnoki ashi.

“Assam nungbo election tembangogo, anungji state nung tang pua aliba dak alia maputsü imlar,” ta election ketdangser kati ashi.

EC-i shimba special flying squads, surveillance teams aser Income Tax Department nungi ketdangsertemi item senji pua liasü.

Item elections atema March 4 nü nungi Model Code of Conduct benoka liasü.

Kerala, Tamil Nadu aser Puducherry nung assembly election kenüyongi dang, May 16, 2016 nü agitsü.