Election agiba yimya

India ama nübortemi mulungba yimten yimsüsürtem shimtetba democratic yimten nung election agiba yimya ya jangratemtsüka lir. Takok toktepba agi tesem aika nung tashiyim amshia rarateper, kati ka lutsüteper, tai apur aser tashiyim agi akoktsü meranger dang ashi, shitakba election agiba yimya agibo tashiyim amshia tokteptsüsa madoker. Election agiba nükjidongji yimsüsütsü sempet aketba aser nübortem asoshi bendanga agüja tenzüktsü tangatetba aliba purtem rongnung tajungtiba nisung aser tajungtiba telok shimtettsü asoshi nübortem nem maongka agütsüba maparen ka lir. Bilemdangdi süra, election magi akhidang ama kibong kati dang melentepa yimsü asü asübo nübortem ajak alar mesüra kilir amai dang kümer chuba kübok lila. Aji oda, tanü democracy yimsü aruba ya nübortem nem yimten nüchiso bener arutsüba yimsü ka lir. Ibayongji, pei lima nung yimten tashiji kibong ka ket nung mesüra chuba ka ket nung masü saka nübortem ket nung ayur aser iba tashiji amshia yimten yimsüsürtem shimer. Atangji, asen lima nung tang election ajanga yimsüsürtem shimba ya küm pongo atema shimer, anungji küm pongoji matem tashibo yimsüsür jagi nübortemi aginüba ama yimsü masüyonga manendaktsütetter, kechiyong tanü tashibo aji atema linük temzüng nung kecha shia mali. Iba atemaji tang onük benoka tejembidak lir. Ibayongji, election aru shia küm pongo atema yimsüsür shimer ta meteta nübortemi kanga junga bilemdanger election nung shilem agitsübaji kanga tongtibang lir. Tawa India nung state pezü aser Union territory ka nung election agiba maparen nung asenoka tangazüktsü aika lir. India nung nübortemi yimsüsür shimba election maparen nung ya kanga süoki ia bilema shilem agir, kechiyong pei lima nung tzü mopong dena election ajanga melentsü, anungji election nung shibai sen teimba agütsür ta masü saka election temer shibai aser koba teloki nübortem alidak tonga aruagi timtem toushi lemsatepa yariteper ta asüba tangatetba nung yarir. Iba tangatetba nung election-i airtema air. Yimten nung shilem agitsü asoshi yimsüsür akümbaji pei asoshi rongsen bushitsü atema masü mesüra pei kinunger adianu mashilen nungi sorkar mapa nung anioktsütsü asoshi masü saka takartem takarba kümdakja pei lima renlokba nung shilem tajung agidaktsütsü aser sensakertem jenjang tajungbai ajungketja pei taküm aser kibong meraketa lidaktsütsüsa inyaktsütsü asoshi shilem agir. Iba tangatetba nung election mapang yimten teloki nübortem matsüngdang election temer parnok asoshi tajung aika inyaktsütsü nangzüker aser aji oda takok ngua sorkar kümtetra meyazüi inyaktsütsü meranger. Election agiba yimya nung yimten telok aser candidate shiai yamaji ochi mulung agi nübortem den jembia election nung toktepba ajanga alima renloker. Nagaland nunga joko küm ka ser tesadang ka shi lirbo election agitsü. Iba election nung yabo taoba election mapangtem ama masü saka yimten telok ajaki nübortem asoshi inyaktsütsü bilemba sentongtem tejangja renemer nübortem den jembitsüla. Nübortemia taoba election mapangtem nung ama masü saka tanü ama tashitemetet agi nübortem shisa tenük lapokja aniba putu ka nung, pei madak yimsü asütsü asoshi peii temulung lemtetba aser nümadangtetba nisung shimtsü renemtsüla. Taoba election mapangbo candidate dang sen meshi saka taruba election nungbo candidate nem sen terabosa agütsütsü tebilemba nung tang yongi meranga inyaka atatsüla. Taoba election mapangbo election-i aitsü asoshi takar aser ozüng raksartem bushi saka tangbo tashitemeteter aser Tsüngrem tsübuba nisungtem bushia idaktsütsü ajungshiteptsüla. Election agiba ajanga asen lima takar kümdakja takar aser sensaker ajak jenjang tajungba nung lidaktsütsü melen asenoki takar aika sensaker kümdaktsüogo aser sensaker ajak alar tiai yokogo. Election agiba ya sen akaba sayutepa toktepba asaya ka masü mesüra tashiyim agi kati ka tsübudakja amokmerentepba sentong ka masü saka lenirtemi pei mulungjang aser tashi ajak agi pei lima aser nübortem tenzüktsü jangraba sayuba mapang aser nübortem asoshi pei mulungba yimsüsür shimtsü maongka anguba anogo lir. Shitakba nungbo election ya temeshi mapa anungji ajaki sarasadema shilem agitsüla. Iba jagi dang asen limai azükaru aser yimjiyimjung arutsü.