Election agitsü mapang anasai aruaka tensa kanga süngjema lir

Changtongya, August 26 : Taküm 2017 küm yabo akhi mapang memesük election agitsü mapang anasai aruaka yimtsüng ajak nung nübortem kanga süngjema lir ta nübortemi metetdaktsü.
Iba o ya yakanü nungi tenzüka tanü Honibar tashi Langpangkong Kaketshir Mungdang Clean Election Campaign Committee purtem yimtsüngtem sema nübortem den shisalemsatepa jajaba mapang nübortemi metetdaktsü.
Election agiba anogo ya raratepba anogo masü saka senso shia pei temeten amshia yimten nung shilem agiba tepela anogo asütsüla ta LKMCECC-i metetdaktsü. Akhi mapang chuba yimli nung kibong kati dang yimsü asüba yimtenren nungi nübortemi mulungba yimten yimsüsürtem nübortemi shima democratic government akümtsü tenzükba ya alima tesem aika nung nübortem aikati taküm tenla agüja raraba ajanga ngutet, anungji election agiba anogo ya nübortem asoshi yimten nung nüchiso anguba anogo ama pelatepa yimten nung shilem agia amongtsüla ta LKMCECC-isa metetdaktsü.
“Ni küm 50 tain sannüker ka lir saka tang tashi ni electronic voting machine mengudang kechiyong election anogo nung vote agütsütsü tasak liasü saka tangbo kodang election arudir, kechisüdir süaka ni kü vote enoktsüi aotsü mulungtetogo ” ta yimtsüng ka nung sannüker kati metetdaktsü.
“Clean election campaign mapa yabo election agiba anogo nung matemtsü kechiyong clean election nükjidongji nübortem meima tenzükba government teti alitsüla,” ta LKMCECC-isa metetdaktsü.
LKMCECC-i yimtsüngtem tonga oagi ajurua nübortem den election nung ochishia shilem agitsü atema shisalemsatepba mapang, election shia candidate-temi nübortem dang terenlok mapatem inyaktsütsü nangzükba kata meinyaktsür, anungji tangbo candidate tem ajak külemi lokti senden ka nung tenangzükba agidaktsütsüla ta nübortemi metetdaktsü.
LKMCECC purtem Langpangkong nung yimtsüngtem sema jajadang yimtsüng kari aoba lenmang kanga mejungi liasü aser light ghonda shia oadokba agi nübortem aser talisa light tashi amshia mapa inyaker aser kaketshirtem timtem aser takoksa ajuruba nguogo.
Taoba anogo asem nung LKMCECC-i Longkong, Yaongyimti old, Yaongyimti new, Chakpa, Mongsenyimti, Salulamang, Chuchuyimlang town, Chuchuyimlang,Unger, Akhoya, Changtongya yimsen,Changtongya aser Yaongyimsen nung nübor lenirtem ajurua election timi agitsü atema shisalemsatepa liasü.
Item yimtsüngtem nung nübortemi election mapang vote mayoktsü aser peisasa pei vote enoktsü nangzüktepa liasü.
LKMCECC-i yimtsüng aser town shia clean election action committee shimtsü asoshi yimten aser arogo nem nungloktsüogo. Item Committee-temji yakta senden mena election ozüng aser inyakyim indang jembitsü LKMCECC tebilemba lir.