Election agitsü Naga nungeri magizüker: NSCN/GPRN

Dimapur, Aenjeti (January) 23 (TYO): Nagaland Assembly election dak sendakba nung tanü NSCN/GPRN-i sangdong ka ajanga, “India aser Naga nunger ajaki agizüktettsüsa Naga yimtenren onük tekaratiba nung jembia latettsü atema onoki jembir,” ta metetdaktsü.
“Military solution toktsür Naga yimtenren latettsü atema India sorkari mera agiba atema pelar aser Naga nunger atema yimtenren latettsü mapang kanga ana nung lir,” ta kasa sangdong ajanga metetdaktsü.
“Küm pongu jungnüa yimtenren ken o jembia arur 2002 küm India sorkari Naga nunger putiotsü balaka aser Naga nunger tensa official süa agizük, aser 2015 küm August 3 nü India Ato Kilonser lia NSCN aser India sorkar tsüngda Framework Agreement sign asü,” ta sangdong nungsa shia lir.
“Anungji Naga nungeri election masü saka yimtenren onük tekaratiba nung latetdaktsünüba tangatetba aser taginüba atema pelar. Ajisüaka India sorkar aser Election Commission of India-i election agitsü atema inyakba ajanga tang NSCN aser India sorkar na ken o tejembidak inyakyim raksatsütsü, aser yimtenren tekaraba nung latettsü atema inyakba nung tetsükdaktsü tulu bener arutsütsü,” ta NSCN/GPRN-isa metetdaktsü.
“Anungji onoki yimtenren onük tekaraba nung latettsü atema lepshia jembir, koba ajanga subcontinent ajak nung tesünep alitsü, aser India sorkaria yamaji yimtenren mera agia inyaktsüla. Yimtenren onük tekaraba nung latetdaktsüner, Naga nunger atema election agitsü lemtetbaji tagizüktetla masü. Anungji election agitsü atema benokertem jagi Naga nunger atema menokdaker. Onoki item ama nisung mesüra telok aitsür, kechiyong yimtenren onük latettsü atema inyakba nung parnoki shilem magir,” ta kasa sangdong ajangasa metetdaktsü.