Election agitsüba otsü

Nagaland nung election ya kodang agidir agiang timi jungjunga aginüba tangatetba ka nübortem aika mulungjangi aruogo ta  angateter. Atangji, karibo Clean election indang yamai jembiyonga takok mangutsü ta jembir kechiyong parnok mulungjangji ‘clean’ masü, anungji parnok jagibo election nung candidate dang sen meshitsü mesüra voter-tem sen agi alitsü yongyar. Aji oda, pei vote aser pei kinunger vote atema sendak balaka ataktsü aser tangar melen proxy itsütsü asoshia jenjang balaka meshitsü aser ano tashiyim amshia tangar amokmerentsü asoshia jenjang balaka asütsü ta pei pei akok election nung tim masüba mapa inyaktsü bilemertemi ‘Clean’ election sentong ya takok ngua mangur. Ano, election mapang nung temenünütsüka aser tezüdangtsüka inyakbaji nisung aikati tangar tenüng atema candidate-tem dang sen meshia chitsür. Iba amaji nübortembo teimbaka tangatetba nung timi election nung shilem agitsü bilemaka item nisungtem jagi nübortem ajak tenüng nung election menentsür. Iba ama tensa dak apet onük jembia alidang election arutsü anungji kodang arudir arung kü vote küsasa ni’ mulungba nung enoktsütsü ta temulungtetba nung senso ajak renemer atatsübaji kanga tongtibang kümogo. Atangji, taruba election ya imlaba dang nungibo tama aser tekaraba agitsüa akok, anungji tang yongi nübortemi komala candidate ka yaritsü, shiba yoktsü aser koba telok nem vote enoktsütsü ta shisalemsatepa jembitsüla aser timi shilem agitsü bilema alitsüla. Election agitsüba ya state government mulung masü saka Election Commission of India mulung, anungji kodangangka agitsüar memetet. Ajisüaka, mapang shitak nung lidi süra 2018 küm February ita nung agitsüa akok. Ano, külen reprangdangra tang chief minister, Shurhozelie ya MLA masü ser chief minister akümba dang, anungji election ozüng nung aliba ama ita trok tsüngda paji constituency ka nungi MLA akümtsüla. Iba amaji ka mesütetra, pa ita trok inyaker anentsü. Aji oda, pa chief minister kümer August tom ka nung ita trok ajungtsü asünungji August nungbosa by-election agitsüsa akümtsü. Aji mesüra ano pa melen chief minister ka shimtsüsa akümtsü. Ano, külen by-election agitsübajia tagi malang, kechiyong ita  pongo-trokka tsüngdasa general election agitsü. Atangji, election inyakyim nung by-election agiba ya general election agitsü küm kabosa anünga ali nungang agir, kechiyong ita ishika MLA inyaktsü atema election agia malang aser election-i aia malang. Ibaji inyakyim tajung ka asütsü ta bilemer. Iba ama terata tia ka nung asenok nokdaka alinungji, taoba hopta nung ” Nagaland nung general election ya  taküm 2017 kümsa agi nunga koma süla ?” ta asüba nung bilemdanga langzütsü mapang agütsüogo. Iba tasüngdangba langzürtemi election yabo kodang agidir agiang, tagitsüsaji, kecha masü saka ochishia timi pei vote pei enokja aginüba olen tajung lemsatepogo. Iba ama telangzüba jagi nübortem mulungjang nung election timi agitsü asoshi tejangraba asentenshi ka adokogo ta angateter.  Iba ‘Electoral’ asentenshi ya takok ngua aotsü atema arogo nung tenzükertemi anir senso ajaki election nung ochishia shilem agitsü Tsüngrem dang nangzüktsüla. Ibai kija, kibong, lokti aser yimten menendaktsüba moijing den raraba tongpang, anungji tanemi mimshia raratsüba tongpang ka masü saka tamang ulushir aser tasü itshir temenen mapa anema ayimtena sarasadema inyaktsüba mapa ka lir. Aji oda, election agitsü anogo sangdongli nungi election agiba anogo tashi nung kongsa sen, yi aser tashiyim amshiba osang angashidir, iba tesem aser nisungtemji tonga oagi sarasademtsütsüla aser arogo nunger ajaki shilem agia ‘Election nung timi shilem magirtem nungi temoatsü agienang, agienang, agienang ‘ ta yimyim ayima yimdong nung jajatsüla. Iba ama yimyim ayima sarasademba ola jagi election nung ochimashi aser tashiyim mapa inyaknertem tasümait kümdaktsütsü aser parnoki parnoksasa tim masüba mapa inyakbatem  nungi anentsü. Iba amaji taruba election nungbo asenoki Nagaland nung agiba election otsü ya melenshidaktsüdi ta, talisa, lanurtem ayongzüker.