Election aliba yong Modi-i Netaji File sayatsü sangdong: Opposition

Kolkata, October 17 (Agencies): West Bengal nung opposition party temi, sangküm state assembly election aliba yong Ato kilonser Narendra Modi-i sangküm January 23 nungi tenzüka Netaji Subhas Chandra Bose file tem sangdongtsü lemtetogo, ta aitsü.
Congress aser CPI(M) densema opposition party temi, election agitsü temelung nung yur Ato kilonseri iba telemtetba agi, ta aitsü, ajisüaka BJP-ibo ibaji tai ta shiogo.
Tang sorkar tashi nung aliba Trinamool Congress-i, iba ya yimtenren tajangzük asoshi amshir ta aitsü.
CPI(M) politburo züngsem, Mohammed Salim-i, nüburtem melungjang nung Netaji alibaji Modi-i rakzüktsü meranger, kechiyong India nunger nüjiso atema raraba nung RSS-BJP-i shilem agia mali, ta ashi.
Osangbenertem den jembidang Salim-i, “Mapang talangka nungi onoki item file ji sangdongtsü akhanger. Kechiba parnoki tesüiba küm ka ser tesadang nung itemji mesangdong (?) Item file sangdongtsü telemtetba agiba nükjidong tongtibangbaji, 2016 assembly election matongdang parnoki Netaji meimertem melungjang koktettsü nükjidong lir,” ta ashi.
Salim-isa, “RSS-BJP-i India nunger nüjiso atema raraba nung shilem kecha agia mali. Iba yongji parnoki nüjiso atema rarar nüngtugu (Netaji) ka nüngdaker. Netaji tangatetbatemji RSS indang communal tangatetba den khenyongi balala ta parnoki angatettsüla,” ta ashi.
October 14 nü Ato kilonseri, sorkari sangküm January 23 nü nungi tenzüka Netaji indang miima aliba file tem sangdongtsü, ta shiogo.
Item file tem sangdongba ajanga India nunger nüjiso atema raraba mapang Netaji samaba indang küm 70 tashi mejangjai aliba otsü jungkai adoktsü.
Ano Senior Congress lenir Rashid Alvi-ia, item file sangdongtsü atema Modi-i süoki ia bilema ali asübo pa tashii aruba sülensa inyakla, ta ashi.
“Parnoki Netaji file tem sangdongtsü süoki ia bilema ali asübo 2014 küm parnok tashii aruba mapang inyakla,” ta Alvi-i ashi.
“Sangküm election agitsü, ta temelung nung yur Modi-i item file sangdongtsü lemtet. Onük ajunga nung pai yimtenren tajangzük asoshi inyaker,” ta paisa ashi.