Election anogo nung Modi indang live telecast meyoktsüla: Grand Alliance

New Delhi, October 12 (Agencies): Deobar nü Bihar nung Grand Alliance-i Election Commission (EC) dang, election agiba anogotem nung Ato kilonser Narendra Modi-i o jembiba live telecast yokba nokdangdaktsüner, ta shidi ajanga mepishiogo.

October 12 aser 18 nü Modi-i lokti senden nung nüboyima jembitsü sentong lir, ta shia JD(U), RJD aser Congress-i EC dang, “Election agiba anogotem nung nüboyimbaji ‘model code of conduct’ anema lir. State tesem kar nung vote agütsüba mapang tanga tesem kar nung Ato kilonseri election nüboyimba jagi vote agütsütsüpur atsüer arutsü aser ibaji election model code of conduct anema alir,” ta shidi nungji shia lir.

Parnokisa Representation of People’s Act kübok Section 126 ajanga television mesüra item amala mesükba osettem ajanga election nüboyimtsü memelar, ta ashi.