Election aser Arogo

Election o arogo na ya kenyongi balala, kechiyong election ya yimten nung yimsüsürtem shimba mapa aser arogo ya Tsüngremi Pa yimli asoshi inyaktsü jatetba rogotemi tentetba telok lir. Ajisüaka, arogo nungertem medeni election agitsü makok, kechiyong arogo nungertemji vote agütsütsü purtem lir. Anungji arogo nungeri arogo nunger mesüka yimten nung shilem agitsübaji kanga tongtibang lir. Ibayongjiang, asenok Khristan-temi süokia ia tekülem mapa meinyaker dang ashi, talisa India nung Hindu nungtembo anepdang pei kidang jungjunga tekülem agir külen dang vote enoktsüi aor aser election-i air candidate-tema parnok pei pei tenla kidangi orr jungjunga sarasadem mapang agir dang election mapa tenzüker aser election mapa atemer. Tetezü, election o arogo nunger na ya shilembo balala saka temangbo kasa dang lir. Aji oda, arogo nunger mejungra election junga magitettsü aser election junga magitetra arogo tashi maittsü. Ibayongji, tanü asen lima nung election timi junga agitsüba indang jembir. Atangji, karibo arogoi election atema mejembitsüla ta bilemer saka ano karibo kechiba arogoi election temenen anema ola madoker ta asüngdanger. Item ajakji pei pei angatetba jembir, anungji kati ka maitsüli. Ajisüaka, election mapang pei vote sen aser mapa yong ayokba, tangar melen vote agütsüba, tangar amokmerenba, tangar ki shibanga yutsüba, kiojen raksatsüba, pua bener aoba, yi jemtepa amongba, transfer talangi mounüba agi pei temeten ayokba aser tashiyim amshia akoktsü merangba mapatemji arogo nungeri inyak memesük asenoki inyaker, anungji arogo nungertemi arogo nungertem dang yamaji teinyak ta arütsütsü aser ajungshitsübaji Laishibai teyuba teinyaktsütem lir. Aji oda, election ajanga arogo nungertem rongnung majinütep aser tetsükchitep adokba mapatemji arogo asoshi tanüla tongpang tuluka asütsü. Ibayongjiang, arogoia repranga atatsübo marem asen lima nung election timi agitsü asoshi amuoka inyaker südi. Aji oda, arogo aser lokti menendaktsüba temenen tashi anema inyaker asünungji, tai dang tai aser shitak dang shiktak ta odiodia shia inyaktsüsa akümer. Ashiko, idangji political party karbo jashitsüa akok mesüra nisung karbo mepelatsüsa jembitsü aser inyaktsüsa akümtsü. Ibayongjiang arogo lenirtem rongnung ainker o jembitsü asoshi ainker nüngdakba indang kanga jembir. Aji oda, akhi tejen lai mapang nung ainkertemi nübortem dang dang masü saka chuba danga dena tarütsü aser tekümdangtsü o shitet ama tanüa shitettsüsa Tsüngrem ain aser tashi aketba arogo lenirtem alitsüla. Ajimesüra, shi tejangraba aser tangatetba kija agi inyakbabo shi aser azü den melangtepba rara ka dang kümadoktsü. Ajisüaka, election timi agitsü asoshi arogoi arogo nungertem nem tangatetba agütsüba mapa yabo tanüla tongpang ka asünungji tanüla nung lumia sarasadema raratsüsa akümer. Aji oda, taoba hopta nung, ” Nagaland nung election timi magiba anema arogotemi ola madok dang yutsü nunga koma süla ?” ta asüba nung aikati shilem agiba asoshi pelar. Telangzürtem rongnung kati ashi ama, temenen tongpang nung arogoi tongti lenir süa merarara, ibaji nisungtem raratepa nguaka police-temi menokdangi repranga yutsü amai asütsü. Iba tangatetba nung arogo nunger ajaki election timi agitsüla ta ola adoktsüla aser arogo nunger shiai election nung timi shilem agitsü mulungtettsüla. Tatsüba agi, arogo nungertemi shilem agiba election-jibo ochishia timi agiba election asütsüla. Tanü asenok tia ajung candidate-tema arogo nunger aser vote agütsürtema noklang nung shilem 95 dakbo tali arogo nungertem lir. Arogo nungerji NBCC aser ABAM ta asüba lokti tentet ya dangbo masü saka Khristan candidate aser Khristan voter-temji lir. Aji oda, item Khristan pur aser arogo nungertem jagi Nagaland nung election timi agitsü mulungtettsüla. Nagaland nung agiba election yabo arogo nunger election, kechiyong arogo nungertemi arogo nunger yimten yimsüsür shimtettsü asoshi election agir, anungji vote ayimba aser agütsüba sentong ajak sarasademer tenzüktsüla aser sarasadema ochishia shilem agitsüla.