Election asü Solution ?

India government o NSCN-IM na tsüngda Naga yimten tebilemtsü latettsü asoshi jembiba maparen nung ‘solution’ angutsü ana nung lir, anungji Naga nungertemi tamajunglen masü saka tajung tebilemba nung iba terenembaji agizüktsü atadaktsüner ta Nagaland Chief minister-i yakanü lokti senden ka nung jembidang ashibaji teimlatsü osang tajung ka lir. Ajisüaka, ano külen paisa 2018 Nagaland assembly election atema renema alitsü ajungshiba o ji temangmangtsüka lir. Pai ashiba amaji, NSCN-IM o India sorkar na tsüngda telatetba kati yakta arutsü süra 2018 election atema aritepa renemtsü menüngdaktsüa akok, kechiyong mapang tatsükabo election magi aotsüsa tangatettep ken o bener arutsüa akok. Ano, ashiko India den Naga yimten telatetba kati bener arutetra, Naga lima nung agiba election yimyaji tang agiba amaibo masütsüa akok. Iba amaji Naga yimten latettsü asoshi ‘solution’ bushiba o ‘election agitsüba na ya külemibo moutettsü. Aji oda, shitakba Nagaland nung 2018 küm assembly election agitsü süra iba küm tashi nungjibo Naga yimten telatetba ka dangi marutettsü südi ta temulung melemi bilemer. Asenok Ao oshi nung ‘election’ ta asüba ya olong ka nung madokteter, anungji election ta asüba ya asenok oshi kümer election ta amshiba tajungba. Yamaji ‘solution’ ta asüba yaa temulungsüa olong ka nung memeyiptetter, anungji tajungba angatettsü asoshi tanü atema yangi ‘solution’ ta amshir. Atangji, yimten yimli benteta yimsüsüa aotsü asoshi election ya solution lir. Iba jagi yimten temzüng ozüng yanglutsü aser iba kübok yimsüsütsü asoshi yimsüsür shimtsü atema election agir. Aji oda, election tetezü lenir shimba. Aji nübortem asoshi kanga nüngdaker. Ajisüaka, tanü lima nung lenir sünür onsara nungji nisung aika lenir sünüa toktepdang tekoknü marem tashiyim amshir, sen aser tagitarutsü tapu balala agi nübortem mesüzüktsü meranger. Iba ama mapang ka nung, ano külen nübortem dak tangatetba peria maka aser rongsen tsütsü sensaker ta asüba agi tashiyim amshitsü maaker aser melamelaa mesüzükdaktsütetter. Iba tebilemtsü jagi Nagaland kangshir. Iba tebilemtsü ya asenoki kodang kodaser koktettsü ta asüba tebilemtsü agi asenok shisabolu tenzükogo. Atangji, iba ama tajungba melenshinüa shisabolua bilembaji asen lima yanglushi tetenzüker asütsü. Joko, asenok chirnurtem tendakbo election nung tanü ama tashiyim aser sen amshiba yimya malitsü. Parnok nisung shia pei vote peisasa sademsadema enoktsütsü anungji tashiyim aser sen agi masü tangatetba agi parnoki parnok yimsüsürtem shimtsü. Iba anogoji taküm lia nguner. Iba anogojiang asenok asoshi yimten nüchiso anguba anogo asütsü. Tanü asenoki yimten nüchiso indang jembiba ya India yimten kübok asenok mulungba meinyaktetter aser asen temeten mamshitetba agi nüchiso aginer. Kasaji tanü asenoksasa asen lima nung tashiyim agi aser rongsen agi nübortem temeten nokdanger. Iba nung jagi asenok nüchi akümtsüla. Aji oda, oagi Delhi nung Naga yimten tebilemtsü latetaka asenok rongnung tashiyim amshiba aser ochimashiba mapatem nungi asenoksasa asenok nüchi mekümtetra asenok asoshi aji solution masü saka tebilemtsüang tuluka akümtsü. Atangji, asenok asoshi tongtibangtibajibo 2018 election asoshi renemtsübaji masü saka Naga yimten tebilemtsü agi asenok nenneter aliba nungi nüchi akümtsüba ya-ang tongtibangtiba asütsü. Election dang nungibo nüchiso tuluba aser tongtibangba. Kodang asenok nüchiso ngudir, idangjibo election mapang shingaia shinga kia meshibangtsütsü, shingaia shinga tsübudakja memerenshitsü, shingaia bendanger anir arua prangpong agi tuita yur shinga menangzükdaktsütsü, sen agi shingaia shinga memesüshitsü. Ibaji dang asenok asoshi ‘solution’ anguba anogo asütsü. Aji oda, election dang tama iba solution-ji angutsü merangtsüla.