Election atema Kejriwal dang nungi shisa agitsü: Sharmila

Imphal, September 25 (Agencies): Meimchir temeten atema inyaker, Irom Sharmila Chanu-i, sangküm state assembly election nung Congress tamakok ngudaktsütsü atema lai Delhi chief minister, Arvind Kejriwal dang nungi shisa agitsü, ta sangdongba sülen anogo ka lir Honibarnü la linük yimtiba, Delhi-i ogo.
Kejriwal ajuruba dak alia Sharmila-i ken zülur, Javed Akhtar den külemi talk show nung shilem agiba densema Delhi nung sentong balala aika nung shilem agitsü.
Armed Forces Special Powers Act (Afspa) anema rarar, Sharmila-i, Manipur assembly election matongtang lai regional party tasen ka tentettsü, ta metetdaktsü.
Tamalen lai, taruba election nung lai Congress lenir tain aser Manipur chief minister, Okram Ibobi Singh den tokteptsü, ta sangdonga liasü.
Hokolbarnü lai, “Arvind Kejriwal-i Congress tamakok ngudakja Delhi Chief minister aküm. Pa ya yimtenren sentong asameyanger tajung ka lir ta ni bilemer. Election nung Okram tamakok ngudaktsütsü atema ni pa aser par party lenirtem dang nungi shisa aginer,” ta jembi.
Tanü Sharmila-i Akhtar den talk show nung shilem agiogo aser Mongolbarnü la International global youth peace festival nung adentsü atema Chandigarh-i aotsü.  Iba festival nung lai award ka agizüktsü liasü saka lai memulung.
September 29 nü la Delhi-i meyipa arutsü aser sentong kar nung shilem agiba sülen October 3 nü Imphal-i meyipa arutsü.
Hokolbarnü Senapati district headquarters nung Sharmila-i Naga lenirtem aser kaketshirtem den shisa lemsatepa liasü.
Iba sülen lai, “AFSPA anema nokdakba mission indang Naga lenirtem aser kaketshirtem den o lemtepogo, ni asoshi iba ya anogo tajung ka liasü,” ta ashi.