Election atema NPF aser BJP na tsüngda tezüngzüktep agiogo

Kohima, Aenjeti (January) 26 (TYO): Yangtepnü (Brihostibar) New Delhi nung BJP National Tir, Amit Shah aser Nagaland chief minister, T R Zeliang nati taruba state election atema NPF-BJP tsüngda tezüngzüktep agiogo.
Rogonü (Hokolbar) nikongdang CM, TR Zeliang-i, taruba Nagaland Assembly election atema menden lemsatsü asoshi BJP aser NPF nati inyaktsü aser party anaprongla nungi team shima tezüngzüktep agitsü bangjemogo, ta metetdaktsü.
Social media post ka ajanga, T R Zeliang-i, BJP den maneni teloktep alitsü NPF-i bangzüngba nung ajemdaker pai Yangtepnü nikongdang New Delhi nung BJP Tir, Amit Shah ajuru, aser state aintsü aser terenlok alitsü atema maneni NPF-BJP teloktep alitsü asoshi tenapronglai bangjemogo, ta metetdaktsü.
CM-isa BJP Tiri mapang agütsüteta o lemtepba atema pa dang pelaba lemsatep.
CM, T R Zeliang-i twitter ajanga, “Tarutsü nung küna tesendaktep tashi taitba aser tajungba akumtsü, aser ibaji ajanga Nagaland state taliba renloktsü,” ta metetdaktsü.
CM, TR Zeliang-isa, state elections agira NPF-BJP teloktep den DAN nung teloktep party temi takok tulu angutsü, ta mulung lema jembi.
Paisa, “Nüburtemi nungitba aser amalitepba ajanga onoki maneni taruba sorkar akumtsü, tashitait sorkar ka yangertsü aser 12buba Nagaland Legislative Assembly anokshiba tu tesüiba otsü ka dang akumtsü. State nung terenlok aser Naga yimtenren onükji onok atema tongtibangtiba onük asütsü,” ta shisem.
NPF-i tamalen telemtetba reprangshia BJP den maneni teloktep alitsü aser Tsüklai (February) 27 nü assembly election nung T R Zeliang chief minister candidate ser tokteptsü lemtetogo.
Aenjeti 23 nü NPF Central Executive Council (CEC) senden amendang ibaji lemteta liasü.
Yaküm Chiteni (July) 18 nü NPF-i BJP den tesendaktep raksaa liasü, ajisüaka taküm Aenjeti 15 nü central office ketdangpurtemi iba onükji CEC nung benok.
2003 küm nungi BJP ya NPF-i aniba teloktep nung dena lir.