Election atsülangtsü atema ECI dang mepishi

Kohima, Aenjeti (January) 27 (TYO): Tanü, Küptoknü Core Committee of Nagaland Tribal Hohos & Civil Organisations (CCNTHCO)-i Election Commission of India (ECI) dang State Assembly Elections atsülangtsü atema mepishiogo.
Aenjeti 18, 2018 nü Election Commission-i, 13buba Nagaland Legislative Assembly election ji Tsüklai (February) 27 nü agitsü, ta sangdonga liasü.
CCNTHCO-i shidi ka ajanga ECI dang, “Independent tentet ka ama, India Temzüng nung Commission dang Parliament aser state ajak legislature atema aser India Tir den tatong Tir atema election agitsü asoshi election dak sendakba maparen ajak achaayangtsü, ketdangsütsü, tetuyuba agütsütsü aser azüoktsü atema shia lir,” ta metetdaktsü.
CCNTHCO-isa, Nagaland nung lokti tenet balalai temepishiba shidi aika züluba, aser tang shima aliba state sorkari Naga yimtenren onük latettsü atema election atsülangtsü atema mepishiba ajak Commission-i meteta dang lir, ta metetdaktsü.
Election magidang yimtenren onük latettsü atema akhangba dak sendakba nung CCNTHCO-i ECI office dang, “Aenjeti (January) 25 nü public consultative senden ka nung nüburtemi obang ka ser parnok democratic temeten atema ola adokogo. Naga nunger taginübaji, India sorkar aser Naga yimtenren teloktem tsüngda yimjung ken o jembiba tatembang kati arutsü atema Nagaland nung Assembly election mapang atsülangdaktsüner,” ta metetdaktsü.
Core Committee-isa, yaküm Luchii (December) ita 15 nü 12th NLA nung MLA temi assembly nung, election magidang Naga nunger ajaki agizüktettsüsa Naga yimtenren onük latettsü atema inyaktsü asoshi India sorkar dang akhangtsü bangzünga ayu, aser ibaji Naga nungeri nungiter, ta metetdaktsü.
Core Committee-isa ECI dang, “Naga nungeri sorkar ka shimtsü atema ECI den külemi inyaktsü melunga lir. Ajisüaka Naga yimtenren onük melatet tashibo onoki iba nungji shilem magitettsü,” ta metetdaktsü.
Core Committee-isa, “Naga yimtenren onük latettsü atema tang ama maongka tajung mengudang, kechiyong yimtenren ken o jembiba jenjang tajung ka nung lir, anungji iba nungji tetsükdaktsü agütsütsüsa onoki meinyaktettsü,” ta metetdaktsü.
Ato kilonser, Narendra Modi-i Naga yimtenren onük latettsü atema inyaker aser Centre nungi tiyongtsüi ia jembir (Interlocutor), RN Ravi den Naga nunger teloktemia iba ken o tembangtsü atema kanga meranga inyaker, ta Core Committee-isa metetdaktsü.
Iba dak sendakba nung Core Committee-i, ECI-i election atsülangtsü atema telemtetba agiba ajanga tetsükdaktsü kecha makai tatembang telemtetba ka agitsü atema tang nüngdaka aliba kanga tongtibang mapang ka agutsütsü, ta metetdaktsü.