Election Commission-i J&K nung election atema tensa asadanger

Srinagar (Jammu & Kashmir), Metsüremi/March 04 (Agencies): Jammu & Kashmir nung Lok Sabha elections aser state assembly election na külemi agitsü atema Hombar nungi tenzüka anogo ananü Election Commission of India (ECI)-i state semdanga tensa asadangdar, ta osang ka ajanga metetdaktsü.
Chief election commissioner Sunil Arora-i aniba Election Commmission team Srinagar tonga aruba sülen parnoki yimtenren party balala den shisa lemsatep, ta ketdangsertemi metetdaktsü.
Parnoki ashiba agi, EC team-i deputy commissioners aser district police tongtitem densema state sorkar ketdangsertem ajurua state tensa asadangtsü.
Hombarnü EC team ji Jammu-i aotsü aser Mongolbarnüa parnoki yimtenren party balala den sorkar ketdangsertem ajurua tensa asadangtsü.
Yaküm December 20 nungi state nung Presidents’ rule lir; iba jakdang ita trok governor’s rule liasü.
State nung PDP-BJP teloktep sorkar yaküm June ita nung chirepa liasü, kechiyong BJP-i iba teloktep toktsü.
Kashmir nung yimtenren party timbakati Lok Sabha election den külemi state assembly elections agitsü melungogo, ajisüaka tawa Pakistan aser India na tsüngda tensa raksaba nung ajemdaker ECI-i state nung election ana külemi agitsü atema tensa junga asadangner.