Election Commission-i PM Modi Biopic sayatsü nokdang

New Delhi, Rongchii/April 10 (Agencies): Election Commission-i election matem tashi Modi indang taküm otsü film “PM Narendra Modi” mesayatsü asoshi tetuyuba agütsüogo. Commission-i ashiba agi, election mapang tetoktepba nung kongshitsü ta bilemba taküm otsü film kecha electronic media ajanga mesayutsüla. Iba ajanga film sayutsü anogo ka lia nokdangogo.
Commission-isa parnok tetuyuba nung, election general conduct dak kongshitsüsa media tashi mamshir, ta ashi.
Parnokisa iba ken o dak sendakba nung tashishiba kar danga lira ibaji retired Supreme Court mesera High Court judge ka lenisüba kübok tentetba telok kati asadangtsü, ta ashi.
Yashi Congress lenir kati iba film nokdangtsü asoshi benokba ken o Supreme Court-i magizük aser ashiba aiba ken o nung okadak mapang aika indokogo. SC-isa, Congress puri ashiba ama iba film sayaba ajanga BJP pur ajangzüktsü majangzüktsü aji Election Commission-i telemtetba agitsü ta ashi.
Election atongtsü lia iba film sayaba ya model code of conduct anema lir, ta Congress-i aitsü. Par party-i taoba mapang nung Election Commission dang iba film ya nüburtem jangrademdaktsütsü asoshi yangluba film ka masü saka yimden yimsüsüba tsütsü amendaker yangluba film ka lir.
Supreme Court-i tetuyuba agütsüba sülen Censor Board-i film sayatsü asoshi temelaba agütsü.
“Election Commission, CBFC aser tanga okadak ajanga temelaba agütsüogo anungji India nung political party kechaia mashishitsü imlar aser onok indang film sayatsü renema lir. Onok atema sarasademtsü ajak dang kanga pelar,” ta film producer Sandeep Singh-i ashi.
Taoba hopta Vivek Oberoi shibai film nung PM MOdi shilem agir, pai Congress pur dak rangloker parnok film tsübur asü Chowkidar’s danda tsübur ta ashiba sülen mepetmesü adok.
Pai iba olen lemsatepba sülen Congress puri telangzüba agüja ashiba agi, “flop actor ka indang tiyazü film ka, koba flop producer kati flop nisung ka indang taküm otsü dak ajemdaker yanglu shiba tazüngla ta jangjaogo.