Election Commission tetuyuba nung Tripura nung election agishi

Agartala, Tsüklai 26 : Sonamura nung election agishiba mapang nung voter tem vote agütsütsü asoshi tarensena nokdaka aliba noksa nung angur.

Agartala, Tsüklai 26 (Agencies): Tripur Assembly constituencies trok tashi nung Tentonü nungi tenzüka Re-poll asü tenzükogo. Rogonü Election Commission-i Sonamura, Teliamura, Sabroom, Ampinagar, Kadamtala-Kurti aser Dhanpur constituency tem nungi booth kaka nung vote agütsüshitsüba atema tetuyuba agüja liasü.
Temetettsü kaji Dhanpur ya Chief Minister Manik Sarkar indang constituency lir. Maneni Tripura election result Metsüremi 3 nü sangdongtsü.
Union Minister of State for Home Affairs Kiren Rijiju-i Küptoknü ashiba agi, Tripura nung BJP puri sorkar kümtettsüba pai kanga temulunglema bilemer. “BJP puri Tripura nung sorkar kümtettsü. Osang ajanga ashiba aser onoki asadangba sülen BJP pur absolute majority asütsü ta asatetogo,” ta pai ashi.
Rogonü Communist Party of India (Marxist) puri state nung election jung junga magitetba atema state election department aitsüogo. Tripura CPI(M) Secretary Bijan Dhar-i iba amala ibazülem mapa anema parnoki yimtong nung longkak aittsü, ta amokmerenogo.
Political party kechaia masüngdang sür nung kodaser election agishitsüba atema tetuyuba agütsü, ta pai asüngdang. Dhar-isa ashiba agi, CPI(M) puri akoktsü ta bilemba constituency tem nung dang election agishitsü asoshi Election Commission-i tetuyuba agütsü.
Ajisüaka Election Commission-i election agishitsü asoshi telemtetba agiba Tripura BJP otongdar Ashok Sinha-i pelashishia agizükogo. Pai ashiba agi, voting machine tem kar mapa minyaki liasü.