Election jakdang PM-i yazü jembir: Mayawati

Lucknow, October 26 (Agencies): Ato kilonser, Narendra Modi-i, BSP-SP ji ka dang ta jembibaji tiyazü ta shia tanü BSP tongti lenir, Mayawati-i, Uttar Pradesh Assembly election jakdang BJP aser par lenirtemi nüburtem dang yazü jembir, ta ashi.
Lucknow nung sangdong ka ajanga Mayawati-i, “Election anogotem mesangdongaka Ato kilonseri par party-i inyaka aruba ama nüburtem nem osang tai agütsür,” ta ashi.
“Ato kilonseri iba ya state (UP) nung par party jenjang majungba ajanga inyak, saka BSP aser SP naji ka dang ta jembibaji pai pasasa ashioktsüba lir,” ta lai ashi.
BSP lenirisa, 1995 küm State Guest House tatalokba mapang SP bangdak lenirtemi la anema tai inyakbaji tai metoktettsüsa ozüng alema inyakba lir, iba mapang nungjagi SP party den tesentaktep kecha mali, ta metetdaktsü.
“Iba mapang nungjagi tenzüka BSP-i teti SP anema arur,” ta laisa shisem.
Mayawati-isa, atangji nungbo BJP aser SP naji ka dang lir, tena teyaritep ajanga tamangba lokti tsüngda rara adokdaktsür, ta ashi.
“1967, 1977 aser 1989 kümtem nung Mulayam Singh (SP tongti)-i Jan Sangh den tensentaktep kaogo aser election nung BJP den külemi toktepogo aser ibaji ajaki meteta lir. Tawa Bihar assembly election nung tenapronglai secular party tem anema külemi longjemer toktepogo,” ta lai ashi.
Laisa, Ayodhya ken o nunga tenapronglai senteper politics asayar, ta ashi.
Deobarnü election nüboyim sentong ka nung Ato kilonser, Narendra Modi-i, SP aser BSP nati kati ka ochimashi miimbangtsür, ta aija liasü.