Election jelia maginer

Nagaland nung election mapang shitak nung agi nungbo ita ter dang lir agitsü . Ibaji election-i aitsü purtem asoshi dang masü saka nübortem asoshia shisabolutsüka lir. Shitakbabo election agitsüba ya nübortem asoshi mapang tajung lir, kechiyong election agiba ajanga dang yimsüsür tajungtem ano shimshitsü aser tamajungertem melena tajung shimtsü. Aji oda, election ya nübortem asoshi yimten temeten aser tashi amshiba mapang ka lir. Ibayongji, nübortem tebilemba metetnüa taoba hopta nung iba osangkaket ajanga nübortem dang ” Nagaland nung Assembly election ya jelia aginunga koma süla ?” ta asüngdanga shisalemsatepogo. Atangji, aikati pei pei angatetba yari temulungjang nung bilemaka, asenok yimya asünungji, nisung aikati pei bilembaji temai adoka melemsatepner, anungji nisung ishikati dang pei bilemba agütsüogo. Item jagi election jelia agitsüba dang nungibo kodang südir süaka election timi shitak agitsübajiang tongtibangba ta bilema nübortem nem tangatetba agütsütsü nüngdakba indang lemsatepogo. Iba tebilemba nungji asen lima tarutsü asoshi shisabolua bilemba aser nübortem meimba shisatsü angur. Atangji, electioni aitsü purtembo renema alitsüa akok aser tang government nung alirtemia election jelia aginütsüa akok saka nübortemi election nung tashiyim mamshitsü aser senyong vote mayoktsü tangatetba kati maru tashibo election jelia agibaji alima raksatsü ariteper amai ka dang akümtsü. Election nung adokner asünungji candidate aikati tashiyim amshinütsü aser sen agi vote alitsü merangtsü. Ajisüaka, nübortem tangatetba agi tashiyim amshinertemji akoktsüla aser sen agi mesüzüktsü merangba tatidangji koktettsüla. Atangji, tang tashi nung nübortemi election nung tim mesüi inyakba indang sasaa jembir aser tang nungibo election shitak timi aginüba indanga kanga jembir. Iba jagi nübortemi asen lima nung election agiba yimya nung ya temelenshi ka kanga rongdak nüngdaka aginüba reprangtetter. Iba jagi asenok dang tarutsü anogotem asoshi teimla tajung ka sayur. Joko, tanü putu atemabo Nagaland ya teraksatsü tashibo raksaogo.Election timi magitetba dang masü saka government nung mapa inyakertem shimbaren nunga tendanger tajungtiba shimba inyakyim kenyongi mali kümogo. Government contract aser supply mapa nunga tender agütsür jenjang shitak agi mapa tajungtiba inyaker aser oset tajung shitak agütsür shimba maparen to, temenungratsüka , otsüang kümogo. Joko, government junga tenzükertem rongnugna jungjunga ajioka yur tenüngsang agüja ajungkettsüba aser ano government mapa nung meshitak, ochimashi aser mapai junga marurtem nem temerenshi agüja metongshitsüba maparen toa kenyongi mali kümogo. Aji oda, aibelenertema memerenshir aser mapa shitak junga inyakertem nema tenüngsang shitak magütsütetter ta asüba yimten aser putu ka nung asenok liadokogo. Government meyong süra nübortem nem magütsüyonga adjustment nung ajak agiadokyonga kecha masü, government meyong süra mashimashi amshiyonga kecha masü aser government meyong süra kidang ayuyonga kecha masü ta bilemba shisatsü tamajungtem aika taintem mulungjang nung iadokogo. Joko, mapa meinyak ser sen agizüka agiba sobaliba aser tiyazü tenüng meyirijang junga zülur item tenüng nung sen agizüka agiba ajakji Tsüngrem nungi anguba temoatsü amai züngshiba putu mapang ka nung tanü tsüraburtem terata aser tetsübu nung nokdaka lir. Aji oda, lanurtem dang taaktsüka asenok tsüraburtemi aibelenba mapa zünger mezüngma lir. Atangji, election marudangsa asenok mulungjang nung item aibelen aser tamajungtemji endoktsü aser nokdangtsü mulungtetter alitsüla. Election ya candidate shimtetba maparen dang masü saka alima nung nübortem asoshi pei tangatetba amshia tajung o tamajung na bendangba mapang lir. Asenokibo tang amai pei ajunga asaa dang mashimashi inyaknütsüa akok, saka asenok sülen arur asen semchirsemnurtem lia aotsüba limaji asenoki ochi agi topur jungjunga yanglutsütsüla. Ibaji tenzüktsü atema asenok dak temelenshitsü aika lir saka mezüng asenoki election timi agitetba ajanga tenzüktettsü.