Election jungjunga aginür

Tang Nagaland nung ajaki kanga aginübaji election timi jungjunga agitsüba ya lir, anungji junga agitettsü imlar. Election jungjunga aginüba tetezüji election-i teyiner ajak aitsü aser pei vote peii enoktsütsü aser voter shingaia pei vote yoka machitsü. Iba ama election ka agitsü Naga nungertemi yongyar. Idangjibo, candidate ajaki senden ayongzüka pei tebilemba aser nükjidong nübortem dang ashitsü asoshi maongka angutsü. Iba ama election nung nisung shia pei voter idendity card bener tarensena nokdaker menüremtepa pei yarinüba candidate yaritsü. Idangjiang, tanü lanurtem yimten nung shilem agitsü jangrar saka sen makaba agi electioni meitetter ta asürtem electioni itettsü aser parnokji adoktsü. Idangjiang, tatar senden nung state aser nübortem nüngdak ken o benoka ken o lemteptsü. Iba ama nübor meimba, tashitemetet aser shisatsü aliba lanur yimsüsürtem tatar senden nung adenshir nübortem ajungtsü aser alima renloktsü ken o benoka o lemtepbaji tanganütsüka asütsü. Atangji, iba ama ken o lemtepba kisüng angaba agia nübortem temoatsü angutsü aser shisarenloktsüsa item tatartem jagi shisalemsateptsü. Iba ama anogo kaji Nagaland tatar senden nung ataloktsü yongyar. Iba jagiang arogoi anir lokti tentettemi Nagaland nung election timi agitsüla ta ola adoker aser nübortemi nungiter. Aji oda, election timi jungjunga agitsü asoshi arogo aser loktilibai kanga süoki ia jembia inyakdang, yimten tsütsü nungi election commission-ia mangatettertem azüoktsü asoshi tim maparen karbo inyaktsüsa akümtsü. Ibaji ka, polling station ajak nung vote tagidak nung video agitsü aser vote agütsüba machine nung temeyong anembaji biometric system asütsü. Iba jagi nisung shingaia tangar melen vote meinoktsütettsü. Iba tebilembaji tazüngertem den taoba hopta nung lemsatepogo. Aji oda, telangzürtem ajaki election timi junga agitsü asoshi iba ama maparen karbosa atongtsüla ta asüba tebilemba lemsatepogo. Atangji, election timi jungjunga agitsü indang jembidang, tebilemtsü akoktsü atema tongtibang wadang asem angur. Ibaji ka, electioni airtem. Tetokteper asünungji kechisüdir süaka adoktsü atema parnoki vote sen agi alitsü merangtsü mesüra tashiyim amshitsü merangtsü. Ano, tebilemtsü wadang kaji, voter-temi sensak aser timtem marem pei vote ayoktsü merangtsü. Atangji, shin o nung ashiba ama, yaseta aliba nisung matsüngdangbo amtsük telong tila kajia tsüngrem ajuru amai asütsü. Ano, tebilemtsü tanga kaji vote agütsüdak government-i yokba polling officer-tem asütsü. Item polling officer-tem ya aika polling station lemzükba mapang candidate ka yaritsü tebilemba nung lemzüker, anungji parnoki pei candidate tsütsü atsünga tim masüba mapa inyaker. Item ama tebilemtsü akoktsüba tashiji nübortem tangatetba nungi angutsü. Tapu tapu agi mesüzüktsü merangyonga aser amokmerenyonga nübortemi pei lima aser tarutsü lanurtem  asoshi indangindanga ochishia nokdakra, iba jagi akoktsü. Alima ajungtsü asoshibo senso shiai tenla kabosa agütsütsüla aser iba tenlaji takartemi pei akaba agi nübortem vote alitsü memerangbaji asütsü aser sensakertemi sensak arema pei vote meyoki indangindanga agütsütetbaji asütsü. Iba jagi asen lima yanglutsü. Iba onük ya joko tenla kidang, lokti adenshidak, alu lenmang nung, mapa inyakdak aser kaketrejutem nung ajaki shilem agi jembitsüla aser jembiba ama mapa küma inyaktsüla. Asen lima nung election ya dang timi jungjunga agitet nung gari lenmang junga adoktsü, government school-tem private schooltem dang nungi tajungba akümtsü, government mozü kitem private mozü kitem dang nungi tajungba akümtsü aser light tashi agir magima angutsü. Idangjibo, Nagaland nung lanurtem zünger mapa manguba otsü mejembitsü saka lanurtem mapa inyakba agi anisüngzüktsü mapang manguba indangang jembitsü. Idangjiang, ‘Made in Nagaland’ temoatsü aika angutsü. Iba temoatsü aginürtem ajaki election timi agitsü merangba mapa nung nung pei akok shilem agitsüla.