Election madong tsüngda center-i petroleum osettem Manipur-i yok

Imphal, January 24(Agencies): United Naga Council (UNC)-i yaküm November 1 nungi lenmang nokdangba sülen joko anogo 80 dak tali jungogo. Lenmang nokdanga ayuba ajanga Manipur nung alirtem chiyongtsü, ki oset balala aser totzü agi kanga anünger.
Centre-i Manipur tensa kanga junga asadangdar, ta Union Minister Dharmendra Pradhan- i Mongolbarnü osangbenertem dang ashi.
Nüburtem okrongba angateta Ministry of Petroleum and Natural Gas ajanga January 22 nü petroleum products truck gari ana yok, aser maneni January 23 nü kasa osettem truck gari 4 Guwahati nungi Imphal-i yok.
“Petroleum products bener Imphal-i tata gari 100 tanü yoktsü,” ta Pradhan-isa metetdaktsü.
Lenmang nokdangba ya Manipur nung tanü tasen masü. Küm shia telungpurtemi aser lokti balalai iba mapa inyaker. Lenmang nokdangba mapang National Highway NH-2 aser NH-202 kobai linük ajunga den Manipur sendaktepa ayur, iba lenmang ana nung senzüsenbonger mali akümer.
Manipur nung shilem ana küma lemsar menden 60 atema March 4 aser March 8 nung election agitsü. Election osang March 11 nü sangdongtsü. Taoba election nung Congress-i menden 42 koka Okram Ibobi Singh tanaben chief minister asütsü asoshi shima liasü.
Totzü abenba gari tem dak injang kahloktsü
Manipur, Tamenglong district nung mejangjaba nisungtemi totzü abenba garitem dak akah. United Naga Council-i lenmang tatem makai nokdangba sülen Manipur tiyonglen alirtem totzü aser ki oset balala agi anüngba ajanga centeri iba timtem angateta tayimtsü ajanga diesel aben tenzükogo.
Totzü abenba garitem Jiri nung Imphal-i oya alidang tanü 11:20 ako meta mejangjaba nisungtemi injang kahloktsü, ta police ketdangser kati ashi.
Gari anükertemi meyiper injang kahloktsüba sülen item nisungtem jena ao, ta paisa ashi.
Iba tatalokba nung nisung asüba mesüra yiruyibongba tang tashi nung osang kecha mali.
Lokti balalai lenmang nokdangba agientsü asoshi mepishiaka, UNC-i tang tashi tekong meranga nokdaka lir.
Government den angatettepba jembinüra UNC-i lenmang nokdangba agientsüla, ta Chief Minister O Ibobi Singh-i metetdaktsüogo.