Election magidang Naga yimtenren onük latettsüla: CCNTHCO

Kohima, Aenjeti (January) 25 (TYO): Naga nunger nüburtemi election masü saka yimtenren latettsü atema akhangba onük nung ajemdaker tanü Japfu Hotel, Kohima nung all Nagaland Tribal Hohos, ENPO, NTC, CNTC, Naga Hoho, NSF, NMA, NGBF, IMTN, ACAUT, UNTABA aser NWSWN külem senden ka menogo, ta CCNTHCO-i sangdong ka nung metetdaktsü.
Iba senden nung bangzüng trok renema liasü aser item rongnung- 2017 küm Luchii (December) ita 15 nü Nagaland State Assembly nung renemba bangzüng aser Aenjeti 23, 2018 nü NPF CEC senden nung iba bangzüngji pusemba nungita Nagaland nung election magidang Naga yimtenren onük latettsüla atema mapa küma inyaktsü asoshi lemteta liasü.
Core Committee of Nagaland Tribal Hohos and Civil Organisations(CCNTHCO) nüngja nung Tribal Hohos aser civil organizations ajak nungi Core Committee ka tentettsü aser iba luden nungjii Civil Organizations aser Tribal Hoho Tirtem densema iba bangzüng atema inyaktsü, ta lemtet.
Senden nungsa, Core Committee jagi yimtenren party ajak dang NLA nung bangzüng renemba ama election magidang yimtenren onük latettsü telemtetba densema peipei bangzüng nung aliba ama inyaktsü mepishitsü; Committee-isa parnok dang nüburtem taginüba akhümtsübua iba onük nung telemtet ka agitsü atema metetdaktsütsü lemtet.
Senden nungsa Election Commission of India (ECI) dang state nung tesünep alitsü atema election agitsü atema sangdongba sota atatsü atema shidi ka zülutsü lemtet.
Senden nungsa NSCN(K) dang India sorkar den ceasefire tezüngzüktep agishitsü aser Naga nunger atema yimtenren ken o jembiba nung shilem agitsü mepishitsü. Iba dak alia India sorkar dang NSCN(K) nokdanga aliba agientsü aser parnok dang ‘kiralongrar’ ta ajaba agientsü atema mepishia shidi ka zülutsü lemtetogo.
Senden nungsa BJP National General Secretary, Ram Madhav-i “Yimtenren onük latettsü atema Election agitsüla” ta jembiba oji süoki ia agir; Naga nungeri tekaratiba nung yimtenren onük latettsü atema ola adokba mapang ka nung iba ama teshisadang makaba o aser tazüngla o jembibaji magizüker, ta bangzünga liasü, ta CCNTHCO sangdong nungsa shia lir.