Election mapa inyakdang akoksar tajungba yaritsü

Dimapur, June 24 (TYO): Election asoshi mapa lemzüka inyakdang asür mesüra yirur Central/State polling personnel nem teyari agütsüba reprangshimogo, ta Home Department, Relief, Rehabilitation Branch-i sangdong ka nung metetdaktsü.
Election mapa inyakdang polling personnel ka taküm samatsüsa tensa ajurura, pa/lar kibong nem sen lakh 10 teyari agütsütsü akok, ta Home Department, Relief, Rehabilitation Branch-i ashi.
Telungpurtemi ozüng alema inyakdang mesüra road mine, bomb blasts, prangpong amer amakdang taküm samara, pa/lar kibong nem sen lakh 20 teyari agütsütsü akok, ta parnokisa shisem.
Election duty nung yiruba ajanga temang teti atema lemtatsüsa tensa ajurura, teyirur nem sen lakh 5 teyari agütsütsü akok. Maneni, road mine, bomb blasts, prangpong amer amakba lendong nung teti atema lemtatsüsa tensa ajurura, sen lakh 10 tashi teyari agütsütsü akok, ta Home Department, Relief, Rehabilitation Branch-isa sangdong nung metetdaktsü.