Election mapang süpokrem magitsüla: Therie

Dimapur, July 30 (TYO): Tanü Conference Hall, Congress Bhavan, Dimapur nung 2-Dimapur-II Assembly Constituency Congress Committee (ACCC) senden nung jembidang NPCC Tir, K. Therie-i, Congress party nung inyakertem teinyaktsü khuret tulu lir, ta metetdaktsü.
Therie-i, party nungi shimba lenirtemi Congress tangatetbatem onüktem sendokogo aser tesüiba mapang lenir tajungtem joko asenok den mali. Anünga aliba party nung inyakertemji party tashi lir, anungji akhangakhanga alitsüla, ta ayongzük.
ACCC nung inyakertemji kanga tongtibang ta shia Therie-i, tangari tatishitsü tajung agitsüsa party nung inyakertemi tajungtiba nung alitsüla, ta ashi.
Paisa, Congress tangatetbatem aser sentongtem angatetdakja party nung inyakertem tali züindaktsütsü nüngdak, ta ashi.
Congress nung adentsü atema lenmang sadema lapoka lir ta shia pai, yimtenren nung shilem agia Tsüngrem tsübuba sorkar ka shimba nung shilem agitsüla, ta  ayongzük.
Terenlok tsütsü Therie-i, “Nisung ajak tejashi nung lir aser tanübo Dimapur ya ‘slum’ ka ama kümogo, kong National Highway densema gari lenmangtem ayongtem den kasa kümogo aser terenlok mapatem khenyongi mali kümogo,” ta ashi.
Paisa, “Nüburtemi tan aliba sorkar nem vote agütsütsüsa joko kuli mali. Vote agütsür shiai kanga shisadanga vote agütsütsüla aser election mapang nung süpokrem magitsüla, kechiyong iba kuli ya ajanga state nung terenlok malir,” ta ashi.
Election mapang nung teyari balala agiba aser tenla angubaji süpokrem den saku lir ta shia NPCC Tir-i, lenirtemi vote agütsütsüpurtem dang süpokrem magitsü atema tesayuba agütsütsüla, aji oda mesüra terenlok mapa inyaktsü atema lenir ka khuret makai akumer, kechiyong pai votes alizük, ta ashi.
Linük tesem ajaklen Khristantem anema inyakba mapatem aser Tenla ki raksatsüba den külemi BJP sorkari Khristantem atema tongtibang anogotem nung official senden ayonger, ta shia Therie-i, shima aliba MLA temi item ama tatalokbatem anema ola kata madok, ta aitsü.
RSS-i Hindu nunger tangatetbatem benoker, ano külen sorkari maneni linük federal aser democratic den mapet inyaker. Tetsür tebur ajaki item onüktem angateta vote agütsütsüla, ta paisa ashi.
Therie-isa tetsürtem dang, Municipal Elections atema renema alitsüla, aser kobi melii party-i tajangrar tetsür candidates nem training agütsütsü, ta metetdaktsü.
Kasa sentong nung Working President, NPCC, Ayang Aonok, Jonathan Ao, Gen. Secy. NPCC, NPMCC Gen. Secy. Sentila, Kughato S. Aye, President, DCC, Dimapur aser Bendangyanger, Vice President, DCC, Dimapur nungeria jembia liasü.