Election mapang yimtaki maotsü lemtet

Dimapur, May 21 (TYO) : Taruba state general election nungibo Dimapur nung alir Aotsür Aortem Dimapur toktsür kechalenia maotsü saka Dimapur nungsa pei pei constituency nung pei pei vote agütsütsü lemtetogo.
Nagaland nung kodangsa general election agidir, Dimapur nung alir Aotsür Aortem teimbaka Mokokchung district kübok pei pei tsürabur yim aser constituency bushia omar, ibayongji Dimapur nung Aotsür-Aotsürtemi yimten nung junga shilem magitetter, ta yangi Dimapur nung Honibar nü Ao Senso Telongjem, Dimapur, Ao Senso Telongjem Chumukdima aser Ao Senso Telongjem Medziphema telongjem senden ka nung Dimapur nung alir Aotsür Aor tashimait ka reprangteta jembiogo.
“Anungji, tang nungibo Dimapur nung alir Aotsür Aor, election-i aitsü pur candidate-tem dak alaka, shinga state general election mapang Dimapur toktsür pei tsürabur yimtsüngi maotsüla,” ta Dimapur district kübok tenteta aliba Aor telongjem asemi lemtetba osang ka metetdaktsüogo.
Dimapur district nung assembly constituency pongo lir. Itemji Dimapur 1, II, III aser Ghaspani 1 aser II. Item constituency-tem rongnungji Ghaspani II dak alaka tanüngba constituency pezü nungjibo Aotsür Aor kibong aser nütsüng tangar dang teimba asütsüsa Tsüngremi moaja lir. Ajisüaka, yimten temeten aser khuret memeteti election mapang nung teimbakati toktsür aoba agi tangari mezüngshir aser akümketa merepranger ta Dimapur nung Aor lenirtemisa ashi.
Mokokchung district-ji Mokokchung district nung alirtem nem toktsür, talisa Dimapur aser Kohima nung alirtemi pei pei alidak vote agütsüra, Nagaland asoshi Aotsür Aortemi shilem tuluba agitettsü ta parnokisa ashi.