Election maparen methitemi inyaktsü: CEO Nagaland

Kohima, Aenjeti 30 (TYO): 13 buba Nagaland Legislative Assembly (NLA) indang election agitsü aliba sentong memelenshitsü ta Chief Electoral Officer (CEO) Nagaland Abhijit Sinha-i metetdaktsüogo.
“Onok dang official süabo mashi saka yashi senden amenba osang onoki angashiogo. Ajisüaka, election dak sendakba maparen nung tetsükdaktsü kecha malitsü aser onoki asüng official notification sangdongtsü” ta tanü osangbener senden ka nung CEO-i ashi.
State Election Department-i ayongba senden nung teden ta Naga Tribal Organisations aser Civil Societies-i political party tem dang shiaka party pezü- NPF, BJP, JD aser INC tem aden, ta Abhijit-isa shisem.
CEO-isa state nung nübortem dang election maparen nung tetsükdaktsü majurutsü atema mapa kecha meinyaktsü mepishia metetdaktsü.
Candidate temi state adena orr ang nomination asütsü asü ta asüngdangdang Abhijit-i “gazette notification agütsüba sülen returning officer aser tenüng agütsütsü indang tesem tejangja metetdaktsütsü. Constituency nung lemzükja aliba tesem nungi dang nomination asütsü akok” ta langzü.
Candidate kar toktepnür saka tashiyim agi sota yura, pa/lai returning officers aser superintendent of police dang security meshitsü akok, ta paisa shisem.
“Nagaland nung tang aliba assembly ya March 13 nü kümsük tembangtsü aser ibaji matogdang ozü department aser ECI-i temzüng nung aliba ama Assembly tasen ka kümtetdaktsütsü atema mapa inyaker” ta kin hohotemi election magitsü mepishiba atema CEO Nagaland-i ashi.
“Election ji agitsüsa aser iba maparen nung tetsükdaktsü kecha majurutsü imlar” ta paisa shisem.
Asüng nungi nominations tenzüktsü aser ibaji Tsüklai 7 tashi anepdang 11:00 ako nungi nikongdang 3:00 ako tashi agitsü. Tenüng meyipa agitsü atema tatembangba anogoji Tsüklai 12, 2018 nikongdang 3:00 ako tashi nung asütsü, ta CEO-isa metetdaktsü.
Aenjeti 27, 2018 nü votes agütsütsü aser Metsüremi 3 nü votes azüngtsü aser Metsüremi 5 tashi nungbo election dak sendakba maparen ajak tembangtsü.
“Tsüklai 7 tashi nung nominations kecha melira, onoki kechi inyaktsü’ar telemtetba ka agitsü” ta Abhijit-isa ashi.
Nagaland assembly election nung amshitsü atema gari peria mangur aser iba jagi Assam nungi gari 4000 shi bener arutsü atema mapa inyaker, ta paisa metetdaktsü.
Asüng tashi nung election observers 55 (22 general observers, 22 expenditure observers aser 11 police observers) tonga arutsü ta Additional CEO, N Moa Aier-ia metetdaktsü.
Central Armed Police Force company 45 shi ka state tonga aruogo aser ano anogo ka ana tsüngda company 250 dak tema arutsü, ta paisa shisem.