Election masü saka Naga yimtenren onük latettsüla: NSF

Aenjeti (January) 23, 2018 nü Naga Solidarity Park, Kohima nung NSF-i ayongzükba ‘Solution not election’ rally nung adener kaketshirtem angur.

Kohima, Aenjeti (January) 23 (TYO): Tanü Kohima nung Naga nunger kaketshirtem aser lanurtem den tribal tentettem aser lokti tentet balala nungi nisung meyirjang ka dak tema adenshia state nung election magidang Naga yimtenren onük latettsü atema takhangba agüja lokti senden ka kaogo.
State nung kaketshirtem tongti tentet- Naga Students’ Federation (NSF)-i Naga Solidarity Park nung iba senden ayonga agi.
Iba senden nung tribal tentettem- Naga Hoho aser Naga Mothers’ Association nungi o jembirtemi, Naga nungeri election magidang yimtenren onük latettsü atema ola adokaka India sorkari Tsüklai (February) 27 nü election agitsü sangdongba atema tasüngdangba kaa jembiogo.
NSF Tir, Kesosul Christopher Ltu-i, “Asen tarutsü tia latettsüji India-Naga yimjung ken o jembiba lir, aser iba onük nung nai mesüra ni ola madokra shirnoki adoktsü?” ta asüngdang.
Ltu-isa, “Iba ama kanga tongtibang tensa ka nung asenok longjemba nükjidong nung tetsükdaktsü agütsütsü asoshi timtem aika ajurutsü, ajisüaka asenoki koma tashi itta nokdaker, aser Naga nunger külem taginüba atema koma bilemtsür, mesüra India-Naga yimtenren ken o talangka jembia aruba atema koma bilemer, iba dakji keta lir,” ta ashi.
Ltu-isa, NSF-i tema nung alirtem mesüra telungpurtem süaka nisung kar tetuyuba nung meinyaker aser meinyaktsü, ta metetdaktsü.
Naga nungeri ano kobika atatsü, ta asüngdanga Ltu-i, “Küm 70 dak tema raraa aruogo aser küm 20 tashi ken o jembia aruba jagi teperi,” ta ashi.
“Election Commission-i State Assembly election agitsü atema anogo mesangdongba mapang nungbo Naga nunger lokti tentet ajaki longjemer election masü yimtenren latettsü atema Centre dang mepishi. Ajisüaka iba olaji mangashii inyakba ajanga India sorkar dak tamang makatettsüsa kümogo,” ta paisa shisem.
“Iba ama inyakyimji onoki ola madoki repranga matatsü saka election masü yimtenren latettsü atema akhangtsü,” ta paisa metetdaktsü.
NMA Advisor, Dr Rosemary Dzuvichu-i, “Naga nunger kanga tongtibang tensa ka nung lir, kong Naga yimtenren onükji ajak atema tongtibang. Naga yimtenren latettsüla atema jembitsüla, ibaji ajanga asen tarutsü atema tesünep alitsü,” ta metetdaktsü.
Senden nungsa NMA secretary, Lochumbeni Humtsoe-i, “Naga nunger ajaki Naga yimtenren onük latetba ajanga yimjung aser tesünep aginer; Naga Mothers taginübaji teti atema tesünep lir. Tesünep ajanga temelenshi aser telongjem alitsü. Tesüiba mapangtem nung Naga nunger peria kangshiogo aser ajaki Naga yimtenren onük latetdaktsüner, tang mapang ya yimtenren onük latettsü mapang ka lir,” ta ashi.
Tanü Naga nungeri election agitsü anema nokdaker, NMA-ia election atsülangtsü atema Ato Kilonser nem temepishiba shidi ka agütsüogo, ta laisa metetdaktsü.
MLA temisa election magidang yimtenren latettsü atema bangzüngogo, ta shia NMA secretary-i yimtenren party tem aser candidate tem dang election nung tokteptsü atema tenüng magütsütsü mepishia metetdaktsü.
Naga Hoho general secretary, Mutsikhoyo Yhobu-i, “Küm 20 tashi yimjung ken o jembia aruba mapangji talangka, ajisüaka Naga nunger aser India sorkar napronglai agizüktettsüsa yimtenren latettsü atema Naga nunger kanga aremzüka atar,” ta metedaktsü.
Paisa Naga nunger lanurtem dang longjemer linük tashi itta yangertsü, iba den külemi Centre-i Naga nunger dang mejungi benshitsü atema joko memelatsü ayongzük.
Iba senden ya NSF tatong Tir, Boveio Poukai Duo leniba nung agi, Temjen Sempo-i sarasadema atenzük aser NSF tongti tezülur, Imtiyapang Imsong-i tepela anküp o jembia liasü.