Election merüka agitsü asoshi Langpangkong nunger tenangzükba agi

Chuchuyimlang, September 03 (TYO): Langpangkong Kaketshir Mungdang (LKM), Clean Election Campaign Committee (CECC)-i ayongzüka asen lima election timyimi agitsüba dak sentakba nung shisalemsatepba sentong tajung ka yangi Langpangkong Govt. High School Chuchuyimlang nung takok ngua kaogo.
Sentong nung CCEC tayonger, Wb. Bendang Yadeni okila jembidang, Mokokchung district kübok constituency 10 lir aser taoba 2013 state election agiba mapang sen crore noklangka ser terserti dak tema indoka liasü, iba ama rongsen jenti laluba ajanga asen lima ochishir nübu madokteter, ta ashi.
Election mapang candidate-tem rongsen meindoki nübu tajung shimtsü nükjidong yur iba sentong ya tenzüker. Aji oda, “asenoki takok angutsü ta ser temulungtetba nung inyakra temelenshiji bener arutettsü, aji saka, makoktsü ta ser inyakra asenoki iba nükjidongji kodanga metongtettsü”, ta paisa ashi.
Nübur ajak nem angatetdaktsütsü asoshi iba ama shisalemsatep sentong ya Langpangkong Tzükong Mungdang kübok yimtsüng, town aser unit ajak nung LKM, CECC ajanga ayonga agitsü tebilemba lir, anungji, iba maparen takok angutsü asoshi ajaki yariteptsü asoshi paisa ayongzüka liasü.
Tanü iba sentong nung election merüka agitsüba dak sentakba nung bangzüng terasem (13) renema yuogo. Item bangzüngtemji; mezüngbuba nung, Langpangkong Tsükong nung temelenshi bener arutsü nükjidong nung LKM ajanga koba election merüka agitsü bangzüng yanglua lir, ya kanga tim aser tanü Naga lima ajak nung nüngdaka aliba teinyaktsü ka ta ajiteta, Langpangkong tsükong sanger ajak lungjemer, LKM, CECC nungita yaritsü aser maparen takok ngua inyaktsü lemtet.
Tanabuba nung, Langpangkong süngkhümshi nung aliba constituency asem (3) nung candidate kwi adokdir adokaka, yimtsüng aser town unit ajak nung LKM, CECC ajanga arok sabang (common platform) ka lapoka candidate ajak nem o jembidaktsütsü (speech agütsüdaktsütsü) lemtet.
Tasembuba nung, yimtsüng aser town unit ajak nung LKM, CECC Sub-committee-tem tentettsü. Iba sub-committee ya yimdeni anir pei süngkhümshi nung nüngdakba lokti tentet ajak lungjemer tentettsü. Clean election tashi ita aotsü atema, yimtsüng shia council chairman, town ward chairman-tem LKM, CECC nung Associate member kaka asütsü lemteta liasü.
Pezübuba aser pungububa nung, election mapang nung temesepba chiyungtsü aser raraba osettsüset khenyongi mamshitsü. Langpangkong yimtsüng aser town unit kecha nunga youth kimen (camp) melapoktsü lemteta yuogo.
Trokbuba aser tenetbuba nung, Langpangkong nunger shingaia candidate dang sen yong pei temeden (vote) mayoktsü. Election mapang candidate dang sen, mapa mesüra nija asoshi tajangzük kecha memeshitsü lemtet.
Tibuba aser tukububa nung, election mapang yim-o-yim tsüngda, yimer tsüngda mesüra pur bendanger den rarabangsen masütsü. Langpangkong nunger ajaki ochi shia constituency ka nung dang tenüng ayutsü lemtetogo.
Ter aser terkabuba nung, Langpangkong nunger shingaia pei vote dak alaka tangar tenüng nung vote magütsütsü (proxy vote). Candidate ajaki nüburtem asoshi terenlok mapa ochi shia inyaktsü nangzükdaktsütsü aser iba tenangzükbaji “common platform speech” agütsüba mapang agitsü lemtet.
Terana aser terasembuba nungji, Arogo tenzükertemi kibok sema sarasadem sentong agia senzütsü. Clean election nükjidong ataloktsü atema, LKM-CECC purtemi Langpangkong yimtsüng aser town unit ajak nung tangatetba lemsatepa jajatsü, aser iba nungji yimden aser nüburtemi nungita yaritsü lemtet.
Langpangkong Tsükong nung temelenshi bener arutsü asoshi koba bangzüngtemsa LKM CECC ajanga bener aru, itemji Langpangkong tsükong yimtsüng aser town unit balala ajak nungi yimden yimsüsür, arogo sannükeri anir arogo tenzükertem, Langpangkong Watsü lenirtem, kaketshir aser lanur telok balala nungi lenirtem, GB, DB-temi mulungsoa agizükba temaitsü ajaki tenangzükba (pledge) ka agia liasü.
Iba sentong nung Nagaland Horticulture Director Wt. Watienla Jamir, Langpangkong Tzükong Mungdang tir Wb. L.Tally Longkumer, Langpangkong Watsü Telen tir Wt. Repasongla, LKM tir Sp. Imnakika Jamir, CECC züngsem Wb. K. Temjen Jamir aser CECC züngsem Wb. Aosanen Pongen nungertemi tepela o den tajungshi aser tayongzükba o tulu bener arua shilem agia liasü.