Election merüktetba nung adentsüla

Tang ya Nagaland ajunga nung nübortemi aginüba temelenshiji election timi aginüba ya asütsü. Ajisüaka, election timi shitak agitsübaji shibai kong nungi tenzüktsü (?) ta asüba tebilemtsü tulu lir. Ajaki election timi aginür saka timi agitsüsa tetenzüker shinga mali. Atangji, ibaji mapa tasak. Ajisüaka, mapa temela aser pei agitsü aliba mapatem nung dang raktepa inyaktsüba mapa masü saka alima aser nübortem ajangzüktsü asoshi pei taküm, rongsen, shisatsü aser nübo ajak tenla agüja inyaktsü tim. Tajungbo südaktsüner aser alimabo tajungba küma melenshidaktsüner saka peiibo kecha metenlatetter aser temelenshia kecha memelenshir ta süra asen lima melenshitsübaji, atangji, tasak asütsü. Aji oda, election timi magiba agi alima telongi aluba aser nübortem timtemba tia reprangteta melenshitsü nüngdakba indangbo jembir saka melenshitsü asoshi mulungtetba senso aser yimtsüng kata melira, akhidang tar nunger otsü nung koya senden lia danü nem tsüngtsüng azüktsütsü jembia amai asütsü. Election timi magiba yimyatemji yimtsüng nung alir senso ajak tenüng nung yimteni dang telemtetba agir nisung asem-pezü kati dang yimtsür-yimer ajak tenüng nung vote enoktsüba, pei vote senyong ayokba, tangar meyong vote enoktsüba, tashiyim amshia nisung tsübudakja vote rakzükba amala tim mesüi inyakba mapatem aika lir. Iba jagi election nung adokertemang timtatemba, madokertemang terokrongba aser nübortemang takoksaba ta shinga tajangzük mengui takoksa nung Nagaland tesempatsüka kümdaktsüogo. Iba ama tia ka nung arogoi anir election merüktettsü asoshi Yimyim agüja apusoba nung ya arogo nunger ajaki shilem tajung agia arogo nunger ama election timi shilem agitsü asoshi mulungtettsüla. Election nung timi shilem agitsü mulungtetba tetezüji lanurtem  asoshi Nagaland tasen aser tajung ka yanglutsü tenzüker asütsü. Shitakba asen lima melenshinüra aser lanurtem asoshi tarutsü anogo tajung ka yanglutsünüra election temenen merüktetba mapa nung ya yim ajaki raktepa shilem agitsü tim. Iba tangatetba nung arogo aser yimten pu sema LKM Clean Election Committee ajanga Langpangkong nungi tenzüker Nagaland ajunga nung election timi agitsü asoshi shisalemsatep sentong tenzükba asenoki nguogo. Iba sentong nung Langpangkong kübok aliba arogo aser yimten lenirtem September 3, 2016 nü Chuchuyimlang nung adenshia taruba election nungibo election timi ochishia agitsü asoshi Tsüngrem tenüng nung tenangzükba agiogo. Iba sülen Dimapur aser Kohima nung Langpangkong nunger lenirtem den kasa khuret lemsatepa jajaba den ano October 22, 2016 anogo nung Langpangkong nung sannükertemia ‘Clean Election’ sentong nung shilem agitsü telemtetba agiba ajaki angashir asütsü. Item osang angashia kija, lokti aser ABAM-i dena LKMCECC mapa asoshi pelaba metetdaktsüogo. Ibaji Langpangkong nunger asoshi temoatsü aser tashi tasen angudak asütsü. Aji oda, akhidanga Langpangkong nungi tanüla asentenshi tulu adoka Nagaland ajunga asentenshi ama, tanü election timi mesüi agiba maparen nunga Langpangkong nungi tenzüka temelenshi tulu adokdakjang ta tang ya sarasadema mapa tenzükba mapang lir. Iba ama election  dak sendakba tim masüba temenen mapatem akoktsü merangba mapang ka nung, Langpangkong nungisa yimtsüng kar nungibo joko taruba election atema yimteni candidate shimba osang yimjak nung metetdaktsüba osangji LKMCECC asoshi taoksatsü osang ka asütsü. Tang ama alima menena aliba merüktettsü asoshi kari anibelem aser rongsen aser nübo endok mesasai inyaka alidang, iba mapa nungita  yaritsü melen tezüdang aludaktsütsüsasa kija, lokti aser yimten shingaia meinyaktsüla. Nagaland nung election merüktettsüba mapa ya yimten aser lokti mapa ka dang masü saka tanüla tongpang ka lir, anungji Tsüngremi mapa inyakdagi aser inyaktsü. Anungji, nisungtemi ayimtenba manganüyonga Tsüngremi ashibabo angatsüla.