Election nung ama Assam nung tatidang agiba mapang tanüker agütsütsü

Guwahati, February 12 (Agencies): Assam nung High School Leaving Certificate (HSLC) aser Higher Secondary School Leaving Certificate (HSLC) tatidang agiba mapang kecha timtem melii agitsü asoshi tatidang agitsü asoshi oset balala ayuba tesem aser tatidang agiba tesemtem nung tanüker teperi agütsütsü asoshi State sorkari telemtetba agiogo.
“Tatidang agiba tesemtem anasa menüngdakba sentong balala matalokdaktsütsü asoshi Section 144 ozüng amshitsü sorkar tebilemba lir,” ta Assam Education Minister, Himanta Biswa Sarma-i metetdaktsü.
“State nung tatidang süngjema agitsü asoshi Education Department-i Home aser Power department indang tashi amshitsü,” ta Education Minister-i video conference ajanga Deputy Commissioner (DC) aser Superintendent of Police (SP) tem den senden agiba mapang metetdaktsü.
“Tatidang atema oset balala ayuba tesem ajunga nung election mapang amai tanüker ayutsü. Iba takdang nung electricity asoshi yinzü ajunga tasen inoktsü aser takdangji temalem nungi azüoka ayutsü,” ta pai shisem.
State nung HSLC aser HSSLC tatidang agitsü asoshi ‘supervising officer’ den DC aser SP temi yaritepa agitsü aser tatidang agishitsüsa kümra, DC ajanga iba tashi amshitsü, ta Sarma-isa metetdaktsü.
“Tatidang agitsü aliba tesem ajunga nung CCTV inoktsü, aser taoba mapang tatidang junga magiba tesemtem nung tenük zünga reprangtsü asoshi Education Department-i item Centre tenüngtem ketdangsertem nem agütsütsü,” ta paisa shisem.
Taküm küm Assam nung HSLC aser Assam High Madrassa tatidang ya February 17 nungi tenzüktsü.
“Board of Secondary Education, Assam (SEBA) ajanga maths subject indang telangzübatem ‘computerised evaluation’ amshia reprangtsü aser iba sentong takok ngura, taruba küm nungi subject ajak nung iba sentong amshitsü,” ta Minister-isa ashi.
“Tang agitsü aliba HSLC tatidang nung ochishia inyaktsü asoshi ‘OMR answer script’ amshitsü aser taruba küm nungi examination fee ama, Centre fee memeshitsü asoshi sorkari bilemdar,” ta Education Minister-isa metetdaktsü.
Assam nung kaketshir tali ajungshitsü asoshi Assam sorkari kaketshir tatidang balala nung akoker nem laptop angati agütsü aser examination fee memeshir.