Election nung ballot paper amshitsüla: Sharad Yadav

New Delhi, Luroi/August 27 (Agencies): Tanü Loktantrik Janata Dal (LJD) lenir, Sharad Yadav-i Election Commission (EC) dang electronic voting machines (EVM) dak melung malemtsüsa aliba kulitem jangjashijang, ta mepishiba den külemi election ajak nung ballot paper amshitsü takhangba agutsü.
Tanü New Delhi nung osangbenertem den jembidang Yadav-i, “Nüburtem melungjang nung EVMs nung melung melemtettsüsa lir. 2017 küm Monupii ita nung Supreme Court-i oshidang agüja liaka Commission-i VVPATs dak sendakba nung nangzükbatem meinyak,” ta ashi.
Terenlok aliba linüktem aika nung ballot papers amshir, ta shia Yadav-i, “EVMs nung melung malemtsüsa lir ta bilema nisungtemi election nung shilem magitsüa akok. Iba nungji lendong tulu keta lir. Elections ji ballot paper amshia agitsüla,” ta ashi.
Mapa manguba tebilemtsü onük nung Modi sorkar aija pai, sorkari jembiba aser atangji na balala, ta ashi.
“2011-12 küm linük ainba rate ji shilem 4 liasü aser 2013-14 küm shilem 3.3 liasü. 2015-16 küm nungbo shilem tesadang agi ishiba kümogo,” ta pai ashi.
Yadav-isa, “Anogoshia mapa 550 makai akumer aser linük nung mapa mengui alir lanur crore 12 lir,” ta ashi.
Paisa, crop insurance scheme ajanga aluyimertem masü saka insurance companies taliba tajangzük angur; iba scheme ajanga insurance companies-i sen crore 9,929 shi tajangzük nguogo, ta ashi.
Taoba mapang Central minister-isa, sorkari nija takümtem libaliro nung jangjongtsü meranger, ta ashi.