Election nung ‘demonetisation’ ji tongtibang onük asutsü: Manmohan

New Delhi, January 09 (Agencies): Hombarnü taoba Ato kilonser, Manmohan Singh-i, demonetization ajanga linük GDP nung kongshiogo, aser iba ya assembly election agitsü aliba state ajak nung tongtibang onük ka asutsü, ta metetdaktsü.
Yangi New Delhi nung Punjab Assembly election atema Congress manifesto sayatsüba sentong nung Manmohan Singh-i, Narendra Modi’er sorkari sen 1,000 aser 500 notes anentsütsü atema telemtetba agiba ajanga linük GDP kongshiogo, ta ashi.
Party manifesto sayaba sentong nungsa State Congress tongti, Amrinder Singh, Rajinder Kaur Bhattal aser Ambika Soni nungera liasü.
Singh-i, state nung Amarinder Singh lenisüba kanga nüngdaker, kechiyong aluyimbaren, manufacture aser tan rongsenkettsüng tensa nung temelenshi adoktsü atema pa mapa den tokteptsüsa shinga mali, ta ashi.
“Punjab nung Akali sorkar ajanga state nung terenlok anenogo, aser nüburtemi tarutsü tia tajungba nüngdaker,” ta Singh-i ashi.
Singh-isa, party manifesto ya visionary document ka lir, aser Alkali sorkari Punjab rongsenkettsüng nung teraksatsüba bener aruja alibaji iba manifesto ajanga yanglutettsü, ta ashi.
Congress manifesto tenangzükbatem rongnung- aluyimertem dang sentsüh ajak agi sen crore 67,000 atoktsü aser kibong lakh 55 shia nung nisung kaka nem mapa agutsütsü densema lir.
Congress-isa tetsürtem nem school nungi PhD tashi angati shisaliok agutsütsü nangzükogo.
Congress sorkar tashii arura parnoki lanurtem mapa mangu tashi ita shi lanur shia nem sen 2,500 agutsütsü nangzük, iba den külemi light atsükba unit shia sen 7.50 aliba nungi sen 5 kümtsütsü nangzükogo.
“Demonetisation ajanga GDP nung kongshiba indang ni Parliament nung jembiogo aser ibaji jangjaogo. Central Statistics Office ajanga asadangtetba agi (2016-17 küm) GDP ainbaji shilem 7.1 liasü, saka nükjidongbo shilem 7.6 liasü,” ta taoba UPA sorkar mapang Ato kilonser, Manmohan-i ashi.
“Ajisüaka iba tasadangba nung ya ‘demonetisation’ agi kongshibabo masadang. Aji asadang asübo iba ya ajanga linük GDP nung kanga kongshiba nenoki angutsü,” ta Congress lenirisa ashi.
Centre sorkari, demonetisation telemtetba ajanga shinga makoksatsü ta jembiba aija Singh-i, ibaji jangjaogo, iba ya ajanga linük Income aser GDP kongshiogo, ta aitsü.
Yashia taoba Union Finance minister, Chidambaram-i, CSO-i GDP ainba indang osang sangdongba ajanga sorkari yazü jembiba jungkai adoktsüogo, ta aija liasü.
Hokolbarnü CSO-i, 2016-17 küm GDP ainbaji shilem 7.1 shi liasü, aser ibaji iba jakdang küm, shilem 7.6 dang ishiba lir. Tesüiba küm asem nung GDP ainba ishitibaji iba ya lir, ta sangdonga liasü.
Manmohan-i ashiba agi, sen tamshidak anentsütba onük ya taruba Punjab election nung dang masü state assembly election agitsü aliba state ajak nung tongtibang onük ka asutsü.
February aser March ita nung Punjab dak alia Goa, Uttar Pradesh, Uttarakhand aser Manipur state tem nunga election agitsü.