Election nung Khristan ka ama shilem agitsüla : ABAM

Dimapur, July 15 (TYO) : Nagaland nung aser talisa Aotsür Aortemi Khristan kati inyakba ama election nung timi shilem agitsüla ta ABAM-i metetdaktsüogo.
Iba o ya yashi Hokolbar nü Kohima nung aser tanü Honibar nü Dimapur nung alir Aotsür-Aortem arogo aser lokti lentet lenirtem den ‘Clean Election’ onük nung jembidang, Ao Baptist Arogo Mungdang (ABAM) nung Executive Secretary, Rev.Dr.Mar Atsongchangeri metetdaktsü.
Nagaland nung yimsüsürtem rongnung menden raktepba ajanga, tang ama, mapang mapang shia Naga lima aser nübortem akoksatsüsa aser nümamedangtettsüsa atalokba ya ngur kanga jashir ta ABAM lenirisa metetdaktsü.
Tanü Ao lima nungi tenzüker Nagaland ajunga nung election timi agitsü asoshi jembiba ya nübortemi kanga nüngdaka ayimtenba ola ka lir, anungji asenoki iba mapa ya Khristan tajung ka ama inyaktsüla ta ABAM Executive Secretary-isa metetdaktsü.
Paisa ashiba agi, tang tashi nung Nagaland Baptist Church Council (NBCC) ajanga sentong yanglur political party balala nungi aser Naga nunger linük tenzüker teloktem nungi lenirtem den ajurutepa Nagaland nung election timi agitsü asoshi jembiogo aser ano tang Nagaland Legislative Assembly nung temendak yimsüsürtem den ajuruteptsü anünga lir. Rev.Dr.Mar Atsongchanger ya ABAM nung dang masü saka NBCC nung tir aser NBCC Clean Election Campaign Committee nunga tayonger lir.
Talisa ABAM ajanga kechisüdirsüaka Aotsür Aortemi Nagaland election nung ochishia shilem agitsü asoshi lemtetba mapatem indang lemsatepdang, ” ABAM-i Ao lima nung senso candidate shimba mapa aitsür aser election nung senso shiai pei alidak pei vote agütsütsüla,” ta ABAM lenirisa metetdaktsü.
Ano, Aotsür Aortem ajaki pei alidak pei vote peisasa enoktsütsüla aser bendanglen alirtemi pei alidakji pei lima ta angateta pei tsürabur yimtsüngtem nung election mapang shilem magitsüla ta ABAM-i jangjajangjaa metetdaktsüogo.
Paisa ashiba agi, NBCC-i Khristan anemba yimten telok anema kanga akanga nokdaktsü.
Iba kasa sentong nung Kohima aser Dimapur nung Aotsür Aor lenirtem den election nung timi agitsü asoshi shisalemsatepdang, shisalen teyur, Tir Yimyim yimozülur, K.Temjen Jamir-i ‘Clean Election’ tetezü nübortemi ‘Clean government’ aginüba ola lir, kechiyong election timi agitet nung dang, nübortem asoshi government tajung ka kümtettsü, anungji iba mapa nung senso ajaki ochishia shilem agitsüla ta ajungshi.
Election menendaktsüba temenentem kar reprangteta lemsatepdang, tashiyim agi akoktsü merangba, yimsüsüba menden business kümdaktsüba, transfer mounüba aser arunüba, mapang matongdang promotion ngunüba, tangatetba mali ser sen aser yi nem anishidaktsüba aser ochimashir tushia amshiba mapatem ajanga asenoki asen lima kanga menendaktsüogo aser lanurtem teimla samadoktsüogo ta paisa metetdaktsü.
Paisa Aotsür Aor lenirtem dang Tsüngrem tsübuba, pei lima aser nübortem ochishia meimba, temetetba aser tangatetba nung takar, sobaliba metetba, tatar senden nung nübortem asoshi jembitetba aser pei dang nungi nübortem temeimba meimba shisatsü aliba nisung asenok asoshi yimsüsür kümdaktsütsü nüngdaker ta metetdaktsü.
Nagaland nung government tajung ka akümtsü atema asenoki Tsüngrem aser nisung dang sen masü shisatsü meshidi aser vote yoka machili ta Yimozülurisa ayongzük.
Election timi magitetba ajanga takoksa angubatem kar lemsatepdang, “tanü Nagaland nung lenmang agi awatsüng akümba, govt hospital nung taneptsü manguba, school nung education tajung manguba takoksatembo yutsür taaktsüka aser temeimtsüka asen lima nung mapa manguba agi asenok jala jabasotem oagi tzümalen bendang lima nung ita sen tila chia hotel nung auso marok shidokja waiter mapa inyaker, pi kidang kima guard nokdaker aser spa nung tsümartem tangar temang massage sütsür akümer. Item tia nungi asenok nüchi akümtsü aser senso tajung ka pei taküm aser pei lima agi nümadangteta alitsü asoshi ‘Clean Election’ nüngdaker ta paisa metetdaktsü.
“Aor tulur aser tilar ajaki Nagaland tajungba ka yanglutsü asoshi, akhi tsüraburtem jilu ajizüka, Nagaland tatembanglak tashi oa tenzüktsü mulungdi,” ta K.Temjen Jamirisa ayongzük.
Iba senden anaprongla nung ABAM Finance & Property Secretary, Rev.I.Meren Pongeneria Aortem dang mapang ajak nung ‘side income’ marishii Tsüngrem akhümtsübua ochishia inyaktsü ayongzük.
Item sentongtem ya ABAM (Women Ministry) nung Secretary, Alemla Mozür lenisüba nung agia liasü aser ABAM nung Media & Social Concern Co-Ordinator, Limasangwa onir liasü.
Iba sentong ya Kohima nung Kohima Aor Telongjemi anepalua Moli ki nung ali aser Dimapur nung Padumpukhuri Baptist Arogoi anepalua parnok tenla kidang liasü.